Dez grandes chefs das Rías Baixas recibirán a Medalla Castelao
As Medallas Castelao premiarán este ano á vangarda gastronómica de Galicia, na que ten un gran peso a cociña das Rías Baixas. Unha das distincións será para o Grupo Nove, asociación nada no ano 2003 composta por 24 chefs, dez deles da provincia de Pontevedra. Todos recibirán o seu galardón o 28 de xuño xunto ás demais persoas e entidades recoñecidas: o historiador Justo Beramendi, a gaiteira Cristina Pato, o presentador Xosé Ramón Gayoso e o Centro Oceanográfico de Vigo.
O Grupo Nove naceu fai catorce anos cando un grupo de chefs uniuse para reivindicar a modernidade e vixencia da nova cociña galega, que combina o mellor da tradición e a innovación. A asociación creceu ata reunir aos actuais 24 chefs cun total de 18 restaurantes nas catro provincias. Suman oito estrelas Michelín, das que seis corresponden a cociñeiros das Rías Baixas. O Grupo Nove, tamén con 18 Soles Repsol e con varios campións de España entre as súas filas, recibiu un importante recoñecemento dentro e fóra de Galicia. A Medalla Castelao, concedida pola Xunta, recoñece a contribución destes mestres dos fogóns a un sector con gran arraigamento na comunidade que nos últimos anos experimentou unha Idade de Ouro.
Seis do oito estrelas Michelín que agrupa a asociación corresponden a restaurantes da provincia de Pontevedra
Os chefs premiados nas Rías Baixas son Javier Olleros (Culler de Pau, O Grove), Yayo Daporta (Restaurante Yayo Daporta, en Cambados), Alberto G. Prelcic (Silabario, en Tui), Antonio Botana (Pandemonium, Cambados), Pepe Solla (Casa Solla, en Poio ), Rafael Centeno e Inés Abril (Maruja Limón, Vigo), Iñaki Bretal (Eirado da Leña, Pontevedra), Xosé T. Cannas (Pepe Vieira, Poio) e Pablo Romeu (Viñoteca Bagos, Pontevedra).
