O destino Rías Baixas proxéctase ao mundo desde Lisboa
A Casa de Galicia en Lisboa foi o escenario escollido pola Deputación de Pontevedra para a proxección do destino Rías Baixas en Lisboa. Neste acto non faltou ningún detalle, desde a gastronomía tradicional da provincia pontevedresa ata a música en directo. Tras as palabras de apertura do director desta entidade, Álvaro Moreira, interveu o presidente da institución provincial, Carmela Silva, quen incidiu en que, na capital lusa, "as galegas e os galegos sentímonos como na casa".
A presentación da campaña turística para 2017, "Moito por descubrir", baseouse en tres grandes eixes: os festivais Rías Baixas , a potencia da provincia no campo do enoturismo e a promoción dos camiños de Santiago ao seu paso por territorio pontevedrés.
Eixes da campaña
Neste sentido, destacouse o nomeamento de Cambados como Cidade Europea do Viño, un título ligado á calidade dos seus albariños e extensivo ao prestixio de todos os caldos cultivados na provincia. Con Cambados como estandarte do enoturismo nas Rías Baixas, a súa alcaldesa, Fátima Abal, incidiu no feito de que a elaboración do viño obedece a un saber facer transmitido de xeración en xeración.
Por outra banda, en relación ás rutas que cruzan Pontevedra na súa peregrinaxe a Santiago de Compostela –Camiño Portugués, Camiño da Costa, Camiño de Inverno, Vía da Prata, Ruta Marítima do Mar de Arousa e Río Ulla e Ruta do Padre Sarmiento–, Silva destacou que un total de 65.000 persoas camiñantes percorreron este seis camiños en 2016 e en que, cada ano, a cifra crece. A este respecto, Carmela Silva apuntou que "o Camiño Portugués teno todo para ser declarado Patrimonio Mundial pola Unesco".
En relación aos festivais Rías Baixas , destacouse que a provincia será escenario de citas xa consolidadas como o Atlantic Fest, Cultura Quente, PortAmérica, Sinsal Son Estrela Galicia, Sorrías Baixas e O Marisquiño así como as dúas grandes novidades deste ano, Vive Nigrán e Festival Cidade Europea do Viño, en Cambados. Neste sentido, Carlos Domínguez, representante de O Marisquiño, incidiu en que estes certames exportan a cultura de Galicia ao mundo.
Proximidade e riqueza culinaria
Así mesmo, neste evento púxose de manifesto a proximidade da provincia pontevedresa e Lisboa, grazas á liña aérea da compañía portuguesa TAP que enlaza ambos os territorios en só 50 minutos. Na súa representación, Paulo Henrique Sallés sinalou que este voo estase consolidando.
Finalmente, coa invitación realizada a todos os presentes para visitar As Rías Baixas, deu inicio un showcooking. No apartado culinario, foi protagonista ademais o Vigo SeaFest, un festival no que son protagonistas os produtos do mar.
