O patrimonio e María Vinyals centran a campaña "Somos historias" en Fitur
O patrimonio como atractivo turístico baixo o lema "Somos historias"; e a figura da escritora María Vinyals, nacida no castelo de Soutomaior e namorada das Rías Baixas, a modo de fío condutor. A campaña que a Deputación de Pontevedra presenta este xoves na Feira Internacional de Turismo de Madrid (Fitur) está xa a punto, e incluirá como prato forte unha curtametraxe rodada en 18 escenarios da provincia para mostrar ao mundo a riqueza material e inmaterial deste destino. Un percorrido visual coa actriz Patricia Torres como protagonista, e a figura de María Vinyals como nexo e elemento vertebrador.
"O vídeo deixará a todo o mundo impresionado", destacou a presidenta da Deputación, Carmela Silva, na comparecencia para anunciar a promoción, na que estivo acompañada do deputado de Turismo, Santos Héctor Rodríguez. A Deputación tomou como punto de referencia que 2018 é o Ano Europeo do Patrimonio Cultural á hora de definir a campaña,
–que terá continuidade con outras accións ao longo do ano–, e fará publicidade do legado natural, material e inmaterial da provincia en oito eixos.
A presentación exponse como un diálogo entre Carmela Silva, Patricia Torres (que exercerá de moderadora) e un arqueólogo da Deputación, quen conversará sobre María Vinyals, o castelo de Soutomaior que viu nacer á escritora, e o rico patrimonio da provincia.
O labirinto de Mogor, un dos máis antigos de Europa, será a imaxe da campaña ao longo do ano
Un dos eixos céntrase no patrimonio "fortificado" e ten como elementos estrela os castelos de Soutomaior e Sobroso, as fortalezas e torres históricas como a de Catoira. O "arqueolóxico" susténtase nos castros (Trega, O Facho, Alobre…); e o "paisaxístico" nos xardíns (pazo de Oca, Rubiáns, Soutomaior, Caldas de Reis ou Lourizán).
O eixo "literario" dará a coñecer a provincia como fonte de inspiración para grandes escritores como Valle-Inclán, Emilia Pardo Bazán ou Julio Verne; mentres que o "relixioso e espiritual" poñerá en valor os mosteiros e cemiterios singulares. O patrimonio "inmaterial" (mitos, lendas e tradicións); o "natural" (Illas Cíes, desembocadura do río Miño, complexo Umia-O Grove, serra do Candán e parque de Barosa ); e o etnográfico e cultural (museos) completan a oferta.
Escritora, activista e viaxeira incansable
A figura de María Vinyals (1875-1940) foi elixida como elemento vertebrador polo seu forte vínculo con este territorio, cuxa beleza eloxiou nos seus escritos. A aristócrata e articulista foi unha precursora da igualdade e viaxeira incansable, e entre os seus escritos deixou precisamente o primeiro traballo sobre a fortaleza pola que camiñou de nena. "Era unha gran namorada da nosa provincia e a través da súa figura poñeremos en valor todos os recursos e produtos vinculados ao castelo de Soutomaior, a súa historia e os personaxes que o ocuparon. Todos eles forman parte do patrimonio natural e cultural da provincia", apuntou a presidenta da Deputación na comparecencia.
A presentación exponse como un diálogo entre un arqueólogo, Carmela Silva e a actriz Patricia Torres sobre a escritora e o patrimonio
A imaxe da campaña sobre o patrimonio tomará como base un elemento patrimonial local pero de alcance universal: o labirinto. En concreto, o de Mogor (Marín), unha das estacións rupestres máis investigadas de Galicia, con presenza ademais noutras civilizacións ao longo da historia. O logo será presentado en Fitur e ao longo de 2018 promocionarase a provincia como un centro de historia, cultura, paisaxe e lenda.
O de Mogor é un dos labirintos máis antigos de Europa. Ademais, está relacionado co mito da Serpe e a aparición de elementos idénticos en puntos tan afastados como Norteamérica.
Oferta desestacionalizadora
"Con esta campaña que arrinca en Fitur presentamos unha oferta desestacionalizadora e de interese no mercado internacional, en liña coas directrices do Plan Estratéxico de Turismo. Ademais, completamos os produtos consolidados de sol, praia e gastronomía, dando a coñecer ás e aos potenciais turistas que ofrecemos moito máis", explicou Silva.
A provincia de Pontevedra posúe un singular e considerable patrimonio cultural e histórico, o que fai do territorio un lugar atractivo para aquelas persoas que fan das visitas culturais o motivo principal das súas viaxes de lecer. A presidenta da Deputación explicou que "as calidades propias do turismo cultural (preferencia do público nórdico e centroeuropeo, a realización de actividades como o lecer ou o goce gastronómico) "fan que esta tipoloxía turística teña un marcado carácter estratéxico para o noso destino".
Unha caixa con produtos gastronómicos elaborados con camelia e un caderno será o obsequio de promoción da campaña
A presentación da campaña "Somos historias" en Fitur , o xoves ás 12 horas, compleméntase cun obsequio de promoción ás persoas asistentes, que tamén estará presente en toda a campaña turística de 2018. Así, entregarase unha caixa que garda un caderno coa imaxe do castelo de Soutomaior, e produtos (galletas e nubes) elaborados en base á camelia, a flor que ten tanta presenza nos seus xardíns. Para iso a Deputación contou coa colaboración do alumnado do CIFP Carlos Oroza de Pontevedra; o CIFP A Granxa de Ponteareas; e o IES Montecelo (tamén da cidade do Lérez), este último encargado das caixas e paquetes nos que se incluirán as galletas e nubes de camelia.
A Deputación apoiará ademais en Fitur as presentacións de Pontevedra (que dará a coñecer o Campionato do Mundo de Triatlon) e Vigo, que promove a candidatura das Illas Cíes como Patrimonio da Humanidade. Ademais, a axenda inclúe unha reunión coa Asociación "Ruta dos Fenicios". Silva lembrou que en novembro a provincia de Pontevedra acollerá a asemblea estatal desta entidade e a Deputación foi elixida para liderar a promoción e difusión na fachada atlántica peninsular da importante "Ruta das Kasitéridas".
Difusión do destino en programas de televisión nacionais
Así mesmo manteranse encontros con axentes turísticos, e reunións con medios de comunicación especializados. Silva exemplificou que o programa Volando Voy, presentado por Jesús Calleja, está interesado en rodar en varias localizacións da provincia de Pontevedra tras o seu paso hai uns meses pola Illa de Arousa . Así mesmo, o espazo dos 2 Senderos del mundo ten en previsión gravar nas Rías Baixas.
Turismo Rías Baixas recollerá as tres "Q" que distinguen a calidade das oficinas do Palacete das Mendoza, A Armenteira e Peinador
"A campaña dará a coñecer produtos moi diferenciados, repartidos por toda a xeografía da nosa provincia, abrindo espazos de colaboración cos concellos e amparándoos baixo o paraugas da marca "Rías Baixas". Cuestións, todas elas, recollidas no Plan Estratéxico de Turismo", apostilou Carmela Silva.