A ponte de Pontevea, declarada Ben de Interese Cultural
A ponte medieval de Pontevea foi declarada recentemente Ben de Interese Cultural (BIC), na categoría de monumento. Trátase dunha construción sobre o río Ulla que comunica as provincias de Pontevedra e A Coruña, na confluencia dos concellos da Estrada e Teo. Para ambos municipios é un referente histórico e monumental que foi testemuña dos principais acontecementos da zona, desde as loitas contra os franceses ata as grandes cheas do río.
A ponte actual foi construída no século XVI e tivo reconstrucións importantes no XVIII. Con todo, a documentación histórica sinala a posible existencia dunha ponte anterior no mesmo lugar, mesmo desde a época romana. Aquí conflúen camiños reais, rutas comerciais e de peregrinación.
A inclusión do monumento no Rexistro de Bens de Interese Cultural de Galicia permitirá aplicar medidas de protección e supoñerá un paso adiante na súa promoción como recurso turístico.
A de Pontevea non é a única ponte que une os municipios da Estrada e Teo, xa que tamén se pode atravesar a fronteira natural do Ulla pola ponte colgante do Xirimbao que, con 80 metros de lonxitude, é un das pontes colgantes máis longas de Galicia. Esta, aínda que é un dos principais atractivos turísticos da zona, foi concibida en realidade como un paso de pescadores. A pasarela, xestionada pola Consellería de Medio Ambiente, permanece pechada fóra da tempada de pesca, entre setembro e maio.
Ademais dun importante coto de salmón, o Xirimbao tamén é unha concorrida zona de lecer a ambas marxes da ponte. Na ribeira pontevedresa, na parroquia estradense de Couso , atópase a área de recreo de Ximonde, que dispón de mesas, aparcadoiros e carreiros que discorren xunto ao Ulla.
