O "Vigo SeaFest" reafirma á cidade olívica como capital europea da pesca
Venres, sábado e domingo. Os días 7, 8 e 9 de xullo. Máis de 23.000 metros cadrados na contorna de os Xardíns de Elduayene do Náutico de Vigo. Con estes datos preséntase o Vigo SeaFest-Festival ARVI do Peixe, un certame co que a cidade olívica reafírmase como capital europea da pesca.
O evento inaugura deste xeito unha primeira edición prometedora e na que conta coa colaboración da Deputación de Pontevedra. Organizado pola Cooperativa de Armadores de Pesca do Porto de Vigo, o VigoSeaFest integra, como non podía ser doutra maneira, a mellor gastronomía das Rías Baixas pero tamén un tentador programa musical, unha aposta continua polo deporte en moi distintas modalidades, un achegamento á industria pesqueira ou talleres para toda a familia. Todas as súas actividades son abertas e gratuítas.
A riqueza culinaria, o argumento de máis peso
Neste sentido, a gastronomía é a gran protagonista deste evento. En concreto, en máis dunha vintena de postos de cociña prepararanse receitas elaboradas con produtos do mar. Un total de 12 prestixiosos chefs presentarán, neste sentido, propostas elaboradas cos peixes capturados polas flotas de Vigo de arrastre, cerco e palangre. Estes pratos de autor poderán adquirirse a 3,50 euros. A eles súmanse outros 12 espazos nos que se servirán todo tipo de especialidades, fomentando as exhibicións de cociña e catas. Destaca así mesmo unha campaña de sustentabilidade a favor da promoción daquelas especies máis descoñecidas ou de menor uso entre os fogóns.
Un nexo de unión co labor pesqueiro
Por outra banda, a nivel pesqueiro Vigo SeaFest favorecerá un nexo de unión entre a industria e a sociedade, pondo de manifesto a importancia económica e social do mar na contorna máis próxima. Trátase, por tanto, dunha aproximación ao labor extractivo, de transformación e de comercialización ligada ao labor pesqueiro así como os seus servizos complementarios.
Un completo programa para toda a familia
Pero ademais, a de Vigo SeaFest é unha oferta lúdica pensada para toda a familia. Así por exemplo, destaca a nómina de persoas artistas convidadas, entre os que se atopan Freedonia, Julián Maeso, Miss Caffeina, Los Hot Chocolates, Clarence Bekker, The Soul Jacket, Los Mambo Jambo ou Las Lollipops. Do mesmo xeito, en materia deportiva acudir a Vigo este fin de semana será sinónimo de gozo ante actividades de waterpolo, balonmán na praia, voley praia, futvoley praia, kaiak polo, motos de auga, fly-board ou bautizos de mar en distintas modalidades. As máis pequenas e pequenos da casa poderán converterse, ademais, en mini-chefs a través de talleres de nutrición e cociña, en biólogas ou biólogos mariños ou protectores do mar. Deseño e realización de cometas, creación de aparellos ou deseño de ecosistemas mariños son outras actividades dispoñibles.
