Cans espera máis de 200 curtametraxes para a nova edición do seu festival
Queda un mes. O 5 de marzo, domingo, o Festival de Cans pechará o prazo de recepción de curtametraxes e videoclips que desexen entrar no concurso da súa nova edición. O certame, nado para a promoción de novos talentos, alcanza así o seu décimo cuarto ano entre os días 24 e 27 de maio.
A pequena aldea de Cans (no Porriño) convértese, edición tras edición, en centro neurálxico da produción galega de curtametraxes e contidos musicais. Na zona, os espazos transfórmanse para converterse en salas de proxección. Non importa o seu uso habitual: adegas e galpóns están chamados a vestirse "de cinema". E os visitantes multiplícanse segundo pasan os anos.
En función dos datos achegados desde a organización do festival, para a nova edición do certame serán admitidas curtametraxes de ficción, non ficción, animación e outros xéneros. Nesta liña, sinalouse que se espera superar as 200 obras, incrementándose así o número de pezas recibidas respecto das pasadas edicións. Os premios, en metálico, alcanzan os 6.900 euros. Destaca neste caso o galardón do xurado á Mellor Curtametraxe, cuxa dotación se cifra en 2.000 euros.
Outros enclaves turísticos
Ademais de participar no propio festival, esta aldea do Porriño suma atractivos coma o Can de Pedra, tallado en pedra e situado encima dunha pena que alcanza tres metros de altura. Xunto a el, o monumento do accidente de Cans, os muíños das Laxes, o monte Castelo, o muro dos Chimpíns ou o Torreiro das Estrelas son paradas obrigadas para quen visita Cans.
