“Fame de experiencias” compite como mellor película turística do mundo e depende do teu voto
“Fame de experiencias” pode coroar o seu periplo entre os principais festivais audiovisuais internacionais vinculados ao turismo co premio gordo: o título de Mellor Película Turística do Mundo. O filme da Deputación de Pontevedra, producido por Esmerarte Industrias Creativas, opta a este galardón concedido polo CIFFT (Committee of Tourism Film Festivals), e nesta ocasión é o voto do público o que decide. O prazo está aberto e podes votar aquí. Estamos moi preto de conseguilo e o teu apoio pode ser decisivo.
“Fame de experiencias”, vídeo oficial da campaña da Deputación e de Turismo Rías Baixas en 2019, compite no People’s Choice Award do CIFFT con outras 29 películas de 16 países, entre eles Portugal, Francia, Dinamarca, Noruega, Croacia, Serbia, Chile, Sudáfrica, Xapón e Myanmar. O prazo permanecerá aberto ata o 25 de outubro e ata o de agora o vídeo que mostra as paisaxes das Rías Baixas e lles rende homenaxe ás produtoras e produtores da provincia está moi ben situado, na terceira posición.
Percorrido exitoso
A película da Deputación pasou por grandes eventos e festivais do circuíto cinematográfico turístico nos últimos meses e acadou nove premios internacionais. Así, foi recoñecida a súa calidade en Fitur 2020, no Golden City Gate de Berlín, no New York Film and TV Awards, no International Tour Film Fest de Bulgaria, no Festival de Turismo de Riga, no Us International Film & Vídeo Festival de Los Ángeles, no SilaFest de Serbia e no Terres Festival de Tortosa.
A gastronomía e as paisaxes das Rías Baixas, as nosas produtoras e produtores, cociñeiras e cociñeiros, mulleres e homes do mar e do rural presentáronse ante as pantallas destes festivais do audiovisual e obtiveron os máximos galardóns nas categorías de Produto Turístico e Turismo Gastronómico.
