A arquitectura das Rías Baixas volve sobresaír en Galicia
As Rías Baixas volven demostrar a súa aposta pola arquitectura de calidade. Seis edificacións da provincia de Pontevedra figuran entre as finalistas dos premios que concederá este mes o Colexio Oficial de Arquitectos de Galicia (COAG). As intervencións compiten nas categorías de Rehabilitación, Reforma e Interiorismo, e Baixo Custo. Ademais, pugna polos galardóns un proxecto de fin de carreira que deseña un complexo en Vincios (Gondomar) denominado"O Fogar do Pobo".
Na categoría de rehabilitación está entre os finalistas a emblemática Torre do Reloxo de Baiona, que data de 1852 e eríxese xunto ao antigo consistorio. O proxecto de restauración foi deseñado polos arquitectos Ramón Viéitez e Alberto Cebral, do estudo Arquétipos!
En Vigo o COAG seleccionou a recuperación dos edificios da zona vella San Sebastián 4 e 6 e Subida ao Castelo 5 e 7, realizada por Javier Franco e Vicente Pintos Arquitectos SLP. Ademais opta aos premios a rehabilitación dunha vivenda tradicional na parroquia de Callobre (A Estrada). Este deseño corre a cargo de Redondo Valladares e Rodríguez SLP.
Interiorismo e Baixo Custo
Na categoría de Reforma e Interiorismo o COAG elixiu entre os finalistas unha clínica de fisioterapia en Porriño (baixo a dirección do arquitecto Wenceslao López Velasco) e un despacho de xeadería en Baiona (de Faustino Patiño, Juan Ignacio Prieto e Andrea Fernández). En "Bajo Custo" pasou o corte as instalacións de "Verde", especializada en impresión dixital en gran formato gráfico, exposicións, eventos e decoración de interiores na rúa viguesa de López de Neira. A intervención foi deseñada por María González e Jordi Castro. En canto ao Proxecto Fin de Carreira, "O fogar do pobo" é un traballo de Jorge Enríquez Méndez.
Á convocatoria destes XVII Premios COAG, que abarca o período 2014-2016, presentáronse 158 traballos dos que foron seleccionados 34. Os galardóns serán entregados o 17 de marzo nun acto que se celebrará no Teatro Principal de Ourense. A arquitectura das Rías Baixas foi a aposta da Deputación de Pontevedra na edición de Fitur de 2016 pola súa calidade e potencial turístico.
