A feira Galiexpo MotorShow arranca en Vigo con 70 expositores, "tuning", derrapaxes e música
Os motores empezan a ruxir no Instituto Feiral de Vigo (Ifevi). Galiexpo MotorShow, que camiña xa pola súa décimo primeira edición, abre mañá o calendario de eventos do sector da automoción na cidade con 70 expositores, 15.000 metros cadrados de superficie e unha estimación de asistencia de 50.000 persoas. Durante tres días os coches tuneados, de competición, clásicos, todoterreos, motos e quads tomarán as instalacións; o público poderá, ademais, gozar de torneos coma o Campionato de Exhibición Drift Indoor, con espectaculares derrapaxes, ou o International Open RC Galiexpo, unha carreira de coches de radiocontrol a escala 1:10.
A feira contará con espazo para a náutica, o automodelismo, e a moda; ademais, habilitarase unha zona infantil. O home máis forte de España, o vigués Roberto Rodríguez, gañador da liga Nacional de Forza, fará unha exhibición durante o evento; tamén se realizará un espectáculo musical o sábado, a partir das 20:30 horas, coa colaboración da Asociación Viguesa de DJ.
Galiexpo MotorShow abrirá as súas portas mañá, ás 10:00 horas, e pechará ás 20:00 horas. O horario do sábado será de 10:00 a 21:00 horas; e o domingo, de 10:00 a 20:00 horas. A entrada ten un prezo de 5 euros (os nenos de ata cinco anos acceden gratis); a asistencia ao campionato de drift require un suplemento de 2,5 euros.
Salón do Automóbil
Un dos pratos fortes dos eventos da automoción nacional chegará o 25 de marzo coa apertura do XXVI Salón do Automóbil de Vigo, o maior de Galicia, con 27.000 metros cadrados de superficie ocupada en tres pavillóns do Ifevi, 31 marcas de coches, 17 de motos e unha asistencia estimada de 90.000 persoas. O volume de negocio que xera a feira, que conta co apoio da Deputación de Pontevedra, ascende a 22 millóns de euros. O salón, que permanecerá aberto ata o 2 de abril, é o segundo do sector máis antigo de España tras o de Barcelona.
Uns días despois chegará o momento da Feira do Vehículo Usado Motorocasión Vigo, que alcanza este ano a décimo séptima edición. Nesta convocatoria exporanse máis de 700 unidades. O evento celebrarase entre o 6 e o 9 de abril.
Por outra banda, a próxima semana terá lugar o Salón Retro Auto&Moto Galicia, un evento monográfico sobre vehículos e motos clásicos e de época, cunha exposición de 6.000 metros cadrados. Será tamén no recinto feiral, entre o 17 e o 19 de febreiro.
