A gala na honra das e dos aloitadores abre o xoves unha nova edición da internacional Rapa das Bestas de Sabucedo
Por oitavo ano consecutivo, a Gala Rapa das Bestas de Sabucedo abrirá o programa de actividades dunha nova edición desta festa de Interese Turístico Internacional que se celebra nesta parroquia da Estrada desde o vindeiro xoves ao luns 10 de xullo. O evento, que ten lugar no mesmo curro no que nos días seguintes representa a ancestral loita corpo a corpo entre o ser humano e o cabalo, pon de relevo a figura de aloitadoras e aloitadores.
O día seguinte, o venres, comezará –como marca a tradición– moi cedo. Ao redor das 6:30 horas oficiarase a misa en honra a San Lourenzo, tras a cal a comitiva encargada da reunión das mandas partirá desde o punto coñecido como O Celeiro. A este labor dedicará toda a mañá, de modo que ao mediodía os animais serán reunidos no Peón. Desde este punto, os animais emprenderán camiño cara á aldea de Sabucedo, en concreto ata o peche do Castelo. Neste espazo, descansarán e partirán cara ao curro. Pero antes, haberá tempo para outro dos actos destacados do cartel da Rapa das Bestas, o festival Rapasóns. Este ano, este certame de música tradicional reúne desde as 22:30 horas nesta localidade das Rías Baixas á Banda de Gaitas de Forcarei, A Banda de Balbina, Chotokoeu, Os Bregadiers e Nao.
Na xornada do sábado, terá lugar un dos momentos máis esperados desta tradición, a entrada dos équidos na aldea. Producirase ao redor das 14:00 horas para, xa pola tarde, participar no que será o primeiro curro da tempada. Previsto para as 19:00 horas, a espera estará amenizada polo grupo estradense Tequexetéldere. No marco do festival Rapasóns, na xornada do sábado actuará ademais Fanfarria Taquikardia. Xa pola noite, na verbena subirán ao escenario as orquestras D`Moda e América S. L.
O domingo, o festival Rapasóns abre a programación dunha das xornadas máis multitudinarias deste evento. Será coa actuación de Mónica de Nut e Luís Martíns, que dará paso ao segundo curro do ano ás 12:00 horas. Ao seu termo, Rapasóns sobe ao escenario a Festicultores, Celso Sanmartín, Xandre Outeiro Teiro, Nosoutros e Chaparracha. Nesta xornada, animarán a verbena nocturna as orquestras Televisión e Marbella.
Como sempre, a do luns será unha xornada solidaria na que o terceiro e último curro do ano terá carácter solidario. Nesta ocasión, a súa recadación destinarase á Fundación Amigos de Galicia. Ao seu fin, actuarán os gaiteiros Airiños de Caldelas nun día no que a solta dos cabalos cara aos seus hábitats de procedencia marcará o punto e final dunha nova edición da Rapa das Bestas, a máis internacional de toda a provincia de Pontevedra.
Actividades infantís, culturais e de sendeirismo
Ademais dos propios actos da Rapa, a festa complétase con actividades pensadas para toda a familia. É o caso de xogos gratuítos para as nenas e nenos, a exposición exterior permanente "Sabucedo e a Rapa das Bestas" ou a ruta dos muíños de Sabucedo .
Adquisición de entradas
Por outra banda, a venda de entradas para asistir aos curros –que ofrecen, cada un deles, un aforamento próximo ás 2.000 prazas– está dispoñible de modo anticipado: online, no teleclub de Sabucedo ou no departamento de Cultura do Concello da Estrada. Estas poderán adquirirse ademais o propio día da celebración nos despachos de billetes do curro.
