A LXV Festa do Albariño 2017 triunfa con dous récords e a presenza de cinema
Outra edición da Festa do Albariño acaba de concluír, e como non podía ser doutra maneira fíxoo ao grande. Con caravanas para acceder a Cambados desde a vía do Salnés, a mañá do sábado xa se venderon 30.000 cataviños no recinto da Calzada, batendo o récord das 35.000 copas ao final dos 5 días de festexo.
Récord fácil de conseguir pola crecente popularidade que a festa ten dentro e fóra da provincia grazas ao abanico de catas dispoñibles ao público. No Túnel do Viño, por 10 €, os visitantes puideron gozar de máis de 140 marcas pertencentes a 58 adegas da Denominación de Orixe Rías Baixas , que esta tempada atraeu a máis de 700 persoas e superou un novo récord de visitas.
En canto ao certame, participaron 59 marcas na XXIX Cata Concurso Rías Baixas Albariño celebrada os días 5 e 6 de agosto. Na Cata Prima do sábado realizouse a primeira selección, e os que, baixo o padal de 24 expertos, conseguiron a puntuación segundo a normativa da Organización Internacional do Viño (OIV) accederon á final do domingo, a Cata Derradeira. Os tres galardoados recolleron os premios no Capítulo Serenísimo no pazo de Torrado o mesmo domingo. O bronce recaeu nos caldos de Mar de Frades, da adega do mesmo nome e pertencentes á localidade de Meis; obtivo a prata Esencia Diviña, de Adegas Gran Vinum e da localidade de Vilagarcía de Arousa; e o ouro foi para Turonia, de adegas Quinta de Couselo do Rosal.
José Coronado como cabaleiro en Twitter "Moi agradecido á Confraría do Albariño e ao pobo de #cambados por tanto agarimo"
Broche de ouro a un día que despois da Cata Derradeira deu paso ao Desfile de damas e cabaleiros xunto coas confrarías enogastronómicas. Unha vez no pazo de Fefiñáns, a partir das 14 h, fíxose entrega dos novos nomeamentos de damas e cabaleiros por parte do Presidente da Xunta Alberto Núñez Feijoo, nos que investía a Dores Calvo, presidenta de Condes de Albarei, Horacio Gómez, ex-presidente do Celta e actual adegueiro, José Ramón Torres Pintos, viticultor e á actriz Beatriz Serén e o seu colega José Coronado, que está a gravar actualmente a serie Vivir sin permiso nas Rías Baixas e que levou todas as miradas e titulares. Este mostrou o seu agradecemento en Twitter: "Moi agradecido á Confraría do Albariño e á vila de #cambados por tanto agarimo"; engadiu que o seu novo labor de embaixador do albariño "non será difícil, non hai que vender nada, véndese só".
Tamén destacou a presenza de foodtrucks por primeira vez, e no plano musical, The Waterboys, que tocaron o venres cunha asistencia lixeiramente menor a outras tempadas, posiblemente polo tempo. O sábado e o domingo foi a quenda de Best Boy e Heredeiros da Crus, respectivamente. Á medianoite do domingo despedíase a festa cun espectáculo pirotécnico.
Esta celebración é de especial relevancia para a produción vinícola local, pois a presenza da Denominación de Orixe Rías Baixas é cada vez maior no estranxeiro: 3 de cada 10 vendas son exportacións. Ademais, este ano a festa está avalada polo nomeamento de Cambados como Cidade Europea do Viño.
