A primeira Vía Verde íntegramente galega estará en Rías Baixas
A creación da primeira Vía verde íntegramente galega está cada vez máis preto. Estará situada no Salnés e será un factor importante para potenciar o turismo na provincia de Pontevedra.
A presidenta da Deputación de Pontevedra Carmela Silva mostrou o seu apoio e compromiso aos alcaldes dos concellos de Caldas de Reis, Vilagarcía de Arousa e Portas, Alberto Varela, Juan Manuel Rey e Víctor Estévez, para a creación da nova vía. O compromiso era comunicado aos medios durante a mañá do 18 de abril no Salnés, onde a presidenta xunto aos alcaldes realizaron un pequeno percorrido sobre a que será a senda verde no futuro.
Ademais de potenciar o turismo de Pontevedra, a senda pretende ser un punto de unión entre o Camiño Portugués, o Camiño da Costa e Santiago de Compostela. En xuño de 2017 ofrecéronse algúns datos sobre o deseño, realizado pola Fundación de Ferrocarriles Españoles, xa que a senda proxéctase sobre a antiga vía de ferrocarril que unía aos tres concellos.
“Millóns as persoas que se moven polo mundo para percorrer vías verdes a través de espazos que ofrezan, ademais, cultura e elementos paisaxísticos de interese”
Na súa construción utilizaranse materiais adaptables á contorna. En canto ao traxecto, que cobre ao redor de 9 quilómetros, terá tanto zonas de descanso como miradoiros. Tamén se inclúe a rehabilitación da ponte sobre o río Umia e máis adiante contará coa rehabilitación do apeadeiro de Ande-Rubiáns en Vilagarcía de Arousa.
Unha vez finalizadas as obras, das que en 2017 estimaban en 10 meses, será accesible non só a peóns e ciclistas senón tamén a persoas con discapacidade física.
A Deputación de Pontevedra convértese así na primeira administración que defende oficialmente este proxecto e ao que apoia cunha suma de 200.000 euros. O plan para a realización da nova senda xa está redactado e está pendente de ser impulsada administrativamente. O obxectivo, segundo palabras do alcalde de Caldas de Reis Juan Manuel Rey, é que “as obras comecen este ano”.
Unha vez materializado o camiño, converteríase na primeira Vía Verde de Galicia, título que fortalecería o destino Rías Baixas e que segundo palabras de Carmela Silva será “un elemento moi importante de atracción turística”. Ademais, engadiu que son “millóns as persoas que se moven polo mundo para percorrer vías verdes a través de espazos que ofrezan, ademais, cultura e elementos paisaxísticos de interese”.
