A Rapa das Bestas regresa cunha gran cobertura xornalística internacional
A Rapa das Bestas de Sabucedo, a ancestral e épica loita corpo a corpo cos cabalos para cortarlles as crinas nesta parroquia da Estrada, congregará entre os próximos 6 e 9 de xullo a miles de persoas, entre elas xornalistas, fotógrafas, blogueiras e bloqueiros de decenas de países que acoden a cubrir e retratar este impresionante espectáculo visual. A sede de Turismo Rías Baixas acolleu hoxe a presentación desta Festa de Interese Turístico Internacional, á que animaron a asistir o deputado provincial Santos Héctor Rodríguez, o concelleiro estradense Juan Constenla, e o presidente da Asociación Rapa das Bestas, Henrique Bazal.
“É unha experiencia única, unha tradición con 400 anos de antigüidade, autosostible e que se celebra nun lugar incrible”, explicou Santos Héctor, quen destacou que o evento é “unha gran oportunidade para coñecer mellor o interior da provincia de Pontevedra e particularmente a comarca de Tabeirós”.
Na anterior edición acreditáronse 183 xornalistas, segundo lembrou Juan Constenla, para apuntar que “este ano imos polo mesmo camiño”. O presidente da Asociación Rapa das Bestas, Henrique Bazal, indicou que “xa están en marcha dous documentais que van mostrar todo o traballo que hai detrás deste acontecemento”, e chamou “a todo o mundo a asistir e participar da ampla programación cultural”.
Tres rapas e Festival Rapasons
A festa arrinca a noite do xoves día 5 coa 9.ª Gran Gala Rapa das Bestas de Sabucedo, e á primeira hora do venres as mandas de cabalos serán guiadas para a baixada desde o monte. Esa mesma noite terá lugar o Festival Rapasons, unha das sinais de identidade cultural do evento.
As tres rapas terán lugar no curro o sábado ás sete da tarde, o domingo ás doce do mediodía, e o luns tamén ás doce, esta última con carácter solidario. Entre medias haberá numerosas actividades culturais. As vendas para asistir no curro están á venda na páxina web oficial da organización (rapadasbestas.gal) e a través de Ticketea.
O cartel da Rapa das Bestas homenaxea este ano ao aloitador falecido Juan Carlos Monteagudo Bugallo, quen foi lembrado durante a presentación na sede de Turismo Rías Baixas.
“Somos historias, somos sostibles”
A Deputación de Pontevedra estará presente ademais na Rapa das Bestas 2018 coa campaña ambiental “Somos historias, somos sostibles”, coa que concienciará sobre a necesidade de recoller os plásticos e cabichas. A mesma campaña poñerase en práctica tamén noutros eventos, entre eles os Rías Baixas Fests, así como en praias da provincia.
