A ruta aérea entre Vigo e Lisboa colle voo
O enlace entre Vigo e Lisboa que opera a aeroliña TAP Portugal voa con vento de cola. A ruta entre As Rías Baixas e a capital de Portugal pechou o mes de abril cun excelente 74 % de ocupación e 2.795 persoas pasaxeiras, o récord desde a súa implantación no aeroporto de Peinador o pasado 1 de xullo.
A aeroliña TAP Portugal apostou por Vigo e os datos demostran o acerto. A conexión de Peinador supera xa as operacións da compañía desde A Coruña e o Principado de Asturias.
A dirección da aeroliña xa mostrara o 9 de maio, no acto que celebrou Turismo Rías Baixas en Lisboa para promover a provincia de Pontevedra, que o voo desde Vigo está a consolidarse e a demanda crece.
Os números así o corroboran. A ruta a Lisboa lograra en xullo o seu mellor rexistro ata abril, incentivada polo efecto estreo, e despois situouse en niveis de entre o 50 e o 60 % de ocupación. Agora experimentou unha sensible subida na que poderían influír os novos horarios, que permiten mellores conexións desde a capital lusa a outros destinos internacionais. O voo de Peinador ao aeroporto Humberto Delgado parte agora ás 15:30 horas, mentres que desde Lisboa a Vigo a saída está fixada para as 12:45 horas.
A terminal viguesa rexistrou un espectacular crecemento do 21 % en abril e moveu a máis de 90.000 persoas pasaxeiras
Os avións desta conexión dispoñen de 70 prazas e os billetes poden adquirirse a prezos desde 50 euros. Ata maio a aeroliña TAP Portugal transportou entre Vigo e Lisboa a máis de 19.100 persoas pasaxeiras, das que case 8.000 voaron entre ambas as dúas cidades en 2017.
Peinador crece un 21 %
E se as cifras do voo a Lisboa son boas, as globais de Peinador en abril poden cualificarse de espectaculares. O aeroporto recupera a boa saúde tras os anos de crise que afectaron ao tráfico aéreo e pechou o mes pasado con 91.606 persoas pasaxeiras, segundo os datos de Aena, o que supón un incremento do 21,2 % respecto ao mesmo período do ano anterior. A subida é superior en catro puntos á media de toda a rede de terminais españolas. A terminal alcanza en 2017 cifras récord de conexións, entre elas oito internacionais: Dublín, Edimburgo, Londres, París, Milán, Boloña, Roma e Lisboa.
