Lalín, "unha vila, mil experiencias"
O Concello de Lalín , a través da concellería de Turismo, anunciou que poñerá en marcha un novo proxecto de divulgación dos seus recursos a través da campaña "Unha vila, mil experiencias".
O proxecto contará con ata 5 actividades divulgativas que se desenvolverán durante toda a tempada de 2018.
Entre estas actividades atópase a segunda edición de "Lalín con gusto", cuxo obxectivo é dar a coñecer a calidade gastronómica do municipio máis aló da festa do cocido. Festa de Interese Turístico Nacional que tivo lugar o pasado catro de febreiro nunha edición que alcanzou as súas vodas de ouro.
Outra das liñas a seguir busca iniciar un programa de difusión de Lalín como "xeodestino" de interese, segundo indican desde a súa páxina oficial de turismo.
O proxecto anual ademais de utilizar os soportes publicitarios convencionais, verase apoiado cunha campaña audiovisual que divulgarán principalmente a través das redes sociais e eventos nos que o concello teña presenza.
O obxectivo, como vén sendo noutros concellos da provincia, é atraer ao público ao municipio máis aló das festas marcadas no calendario.
Legado castrexo e pazo Liñares
Entre o patrimonio que se pode localizar no municipio, sobresae a gran cantidade de xacementos castrexos. Segundo deixaron plasmado na páxina oficial "Lalín é un dos municipios galegos que conta cunha maior presenza de patrimonio castrexo", situando a castro de Doade como "un dos maiores referentes turísticos patrimoniais do concello".
Por iso, o quinto traballo audiovisual lanzado para divulgación turística está centrado neste legado arqueolóxico. As anteriores "cápsulas" audiovisuais estiveran dedicadas á natureza, a gastronomía, os espazos urbanos e a cultura.
O vídeo foi titulado "Lalín, un lenzo histórico e contemporáneo", e busca exhibir esta riqueza patrimonial e fomentar a súa valoración histórica. No mesmo vídeo inclúese tamén o Centro de Xestión do Coñecemento Arqueolóxico (CXCA) situado no pazo Liñares.
Trátase dun laboratorio de restauración e divulgación que pretende ser un referente nacional e internacional de investigación e coñecemento da cultura castrexa e da Idade de Ferro.
En 2017, o pazo Liñares superou as 10.000 visitas aumentando un 36 % con respecto 2016 e sendo un dos puntos máis visitados do municipio. Outro centro de interese ao redor desta cultura castrexa é o Castrodeza.
Camiño de Santiago
Ademais do legado histórico e outros atractivos naturais, Lalín goza do paso de dúas rutas do Camiño de Santiago (Vía da Prata e Camiño de Inverno). Entre ambas conseguiron que en 2017 chegasen máis de 8.000 peregrinos e peregrinas, superando con fartura as cifras dos anos anteriores.
Para dar servizo a tanta peregrinaxe, a localidade conta con dous establecementos públicos, o pavillón municipal e o albergue da Laxe que se suman á hospedaxe privada.
