As dúas series nacionais sobre narcotráfico prepáranse para a rodaxe nas Rías Baixas
As dúas principais cadeas de televisión privada en España puxeron os ollos en Galicia tras o éxito da serie Narcos (Netflix), sobre a historia do traficante colombiano Pablo Escobar, e xa se preparan para rodar nas Rías Baixas. O equipo de Fariña, que emitirá Antena 3 e está baseada no libro homónimo do xornalista Nacho Carretero, xa traballa sobre o terreo e estes días elixe os extras da ficción, protagonizada polos galegos Javier Rey e Marta Larralde. A rodaxe de Vivir sin permiso (Telecinco), que encabezan José Coronado e Álex González e baséase na novela Todo é silencio, de Manuel Rivas, comezará previsiblemente a finais de xuño e prolongarase seis meses.
A Casa da Luz de Pontevedra acolle mañá de 9:30 a 14:00 horas e de 16:00 a 19:30 horas as probas para elixir os extras de Fariña, que se gravará, entre outras localizacións, en Vilanova de Arousa, en Vilagarcía de Arousa, en Cambados, no Grove e en Pontevedra. Na serie, de Bambú Producciones (a mesma que produciu a serie que tivo tanto éxito Velvet), Rey interpreta o xefe dunha rede de narcotraficantes; e Larralde a súa muller, presa dun debate interior sobre a actividade do seu marido. Tamén participan no elenco Tristán Ulloa, Manuel Durán (Morris) e Carlos Blanco, entre outros. A repartición conta cunha ampla representación de actores e actrices de Galicia.
Vilanova de Arousa , Vilagarcía de Arousa , Cambados, O Grove e Pontevedra, están entre as localizacións da ficción que protagonizan Javier Rey e Marta Larralde
Rey é un dos protagonistas de O final do Camiño, serie emitida recentemente en TVE e TVG, e tamén gravada nas Rías Baixas. A ficción está ambientada nos anos nos que se construíu a catedral de Santiago, e as localizacións centráronse neste caso nas comarcas de Deza e Tabeirós-Terra de Montes. O final do Camiño, emitida en prime time, chegou a ser líder de audiencia na súa estrea con máis de 2,2 millóns de espectadoras e espectadores.
Fariña, a obra de Carretero, aborda o narcotráfico galego desde as súas orixes, co contrabando de tabaco como precedente, e a través de testemuños de xuíces, policías, xornalistas, persoas arrepentidas e nais de toxicómanos.
Narcoempresario
Vivir sin permiso, pola súa banda, está producida por Alea Media e narra a historia dun poderoso narco, Nemo Bandeira (José Coronado), que logrou limpar a súa imaxe e é o empresario máis importante de Galicia. Álex González encarna o avogado Mario Mendoza, afillado do patriarca e que aspira a poñerse á fronte da organización. A rodaxe terá como epicentro a comarca do Salnés.
