As escavacións na Lanzada revelan que é un enclave fundamental da Idade de Ferro no noroeste peninsular
O Campo da Lanzada era un complexo comercial de gran calado desde o século VI antes de Cristo e ten unha importancia crave para comprender o mundo da Idade do Ferro no noroeste peninsular. A última escavación no xacemento, promovida pola Deputación de Pontevedra e na que participaron máis de 20 especialistas en arqueoloxía, puxo ao descuberto máis de 15.000 pezas e 17 esqueletos, ademais de revelar datos inéditos que dan fe da transcendencia do enclave costeiro situado no Concello de Sanxenxo.
Un dos principais é a constatación de que os habitantes do Campo realizaban intercambios comerciais con Italia, Tunisia e Palestina desde 600 anos antes da chegada da civilización romana. Outro, o achado da primeira factoría de salgadura prerromana do noroeste peninsular, cando ata agora os estudos apuntaban a que todas tiñan unha orixe romana. "Mentras o habitual neste tipo de industrias era contar con entre oito ou dez depósitos, na Lanzada apareceron ata 29 piletas destinadas á fabricación de salsas e a conservación de alimentos", explicou Rafael Rodríguez, arqueólogo da Deputación, durante o balance dos resultados da campaña, que se prolongou sete meses, xunto coa presidenta da institución provincial, Carmela Silva; o alcalde de Sanxenxo, Gonzalo Pita; e o presidente da Comunidade de Montes de Noalla, Roberto Garrido.
A Lanzada testemuña a importancia da pesca e o seu grao de desenvolvemento xa hai máis de 2.000 anos. Os arqueólogos atoparon restos dun gran número de cetáceos, vértebras e ósos, que para o director da campaña dan indicios claros de que na Idade do Ferro xa estaba organizada a caza de baleas.
Os achados acreditan o enorme valor científico do xacemento e o seu potencial turístico. Silva manifestou que está pendente o proxecto de musealización, que levará a cabo o Ministerio de Fomento, e realizaranse actividades de divulgación para dar a coñecer o xacemento e ampliar a súa investigación. "É un espazo fundamental para coñecer o tránsito da Galicia galaica á Idade Media", apuntou Silva. A área visitable do asentamento triplicou a súa superficie tras a campaña, pasando de 600 a 1.800 metros cadrados.
Cristiáns primitivos
A aparición de esqueletos achega tamén novas conclusións que enriquecen a información sobre os enterramentos. O achado de tres adultos, entre eles a bautizada como Cornelia, unha muller nova do século V cuxos restos se conservan en excelente estado, permitiron coñecer que a necrópole da Lanzada é maior do que se pensaba e resulta probable que, debido ao ritual de inhumación, en caixa, trátese de cristiáns primitivos.
Os esqueletos de 13 nenos menores dun ano e outro con menos de dous, de entre os séculos I e II d.C., converten ademais o Campo no primeiro lugar de Galicia no que se atopan restos deste tipo de enterramentos.
Entre as 15.000 pezas extraídas durante a campaña destaca o volume de "terra sigilata"(cerámica de luxo na que poden verse grafitis con nomes romanos), 25 moedas dos séculos I-IV d.C., obxectos feitos con óso (peites e elementos decorativos), e 358 metais entre os que sobresae unha espada de 33 centímetros probablemente Mediterránea, quizais chipriota, e pertence a unha época entre os séculos VIII e IV a.C.
