As festas patronais de Lalín convídannos a descubrir o interior
Lalín celebra entre os días 22 e 26 de setembro as súas festas patronais na honra á Virxe das Dores. Son cinco días de festexos nos que haberá lugar para a verbena, con algunhas das mellores orquestras de Galicia, os concertos e os actos lúdicos para todas as idades, ademais dos tradicionais actos litúrxicos.
As festas arrincan co descubrimento dunha placa na rúa Matemático Rodríguez, en homenaxe aos bosques da localidade. Trátase dun gravado que recolle unha cita de Castelao, dos anos 40, que di o seguinte: "Eu cavilo na sombra fresca das carballeiras de Lalín e síntome fortalecido".
Os bosques de Lalín son, precisamente, un dos recursos paisaxísticos e turísticos máis destacados do municipio, que conta con castiñeiros e carballos centenarios, como os que crecen na Fraga de Catasós, declarada monumento natural. O concello presentou este verán un vídeo promocional baixo a lema "un interior único" para dar a coñecer a beleza das súas paisaxes naturais.
A celebración das festas patronais constitúe unha oportunidade para descubrir os encantos que nos ofrece a capital do Deza e a súa comarca, tamén no ámbito da gastronomía.
Máis aló do cocido
Lalín fíxose soado polo seu cocido, un prato típico que ten en febreiro a súa propia exaltación gastronómica, declarada festa de interese turístico nacional. Non obstante, o concello quere reivindicar a calidade da súa gastronomía máis aló do seu prato estrela. Enmarcado neste obxectivo áchase o novo vídeo de promoción que lanzou recentemente a institución municipal baixo o título "lenzo de sabor", no que destacan produtos como as hortalizas, o mel, o pan e o queixo.