As Rías Baixas enfilan un verán de récord turístico
O turismo en Rías Baixas vive unha época dourada a todos os niveis. A previsión de ocupación hostaleira máis conservadora da Deputación de Pontevedra para o verán supera xa o 80 %, o que excede a estimación de 2017 a estas alturas (78 %), mentres que o Clúster de Galicia elévao mesmo ata o limiar do 90 %. O portal de reservas Booking, unha referencia para ter en conta polo volume de reservas que xestiona, constata un 87 % para xullo, e un 88 % para agosto na provincia.
“Moitos establecementos confírmannos que xa cubriron todas as súas prazas”, explicou esta mañá a presidenta da Deputación, Carmela Silva, ao dar conta dos datos. Por comarcas, a previsión de ocupación é dun 91 % no Baixo Miño, o 89 % en Vigo, un 85 % no Morrazo, o mesmo porcentaxe en Caldas, un 84 % no Condado-A Paradanta, un 77,5 % no Salnés, un 75 % en Pontevedra, e un 61 % en Deza-Tabeirós e Terra de Montes.
As expectativas son tamén moi favorables para os aloxamentos de turismo rural. “A provincia lidera os ránkings de incremento da demanda e está á cabeza na oferta de establecementos destas características, con 168”, explicou Carmela Silva. A previsión de ocupación alcanza xa o 69 %, cando o verán pasado a esta altura situábase nun 67 %.
A Deputación tamén conta con datos de ocupación de vivendas turísticas, que chega xa ao 75 % na provincia, mentres que as reservas para os cámpings pasan o 76 % en xullo e o 86 % en agosto.
O turismo estranxeiro sobe un 50 % na última década, e As Rías Baixas destaca entre as zonas de España onde máis creceu a rendibilidade do destino
Os datos confirman o excelente ciclo do sector turístico na provincia de Pontevedra, tanto na costa como no interior. O Instituto Nacional de Estatística (INE) reflicte que no primeiros cinco meses do ano recalaron nas Rías Baixas 379.000 visitantes, dos cales 92.800 procedían do estranxeiro.
A provincia rexistrou o mellor maio da historia no que ao turismo refírese desde que hai datos do organismo estatal. De todas as persoas que visitaron Galicia en maio, o 30 % estivo na provincia de Pontevedra. Nunha década, ademais, o turismo estranxeiro creceu un 50 % segundo constata o INE.
A presidenta provincial resaltou tamén no seu balance as conclusións do barómetro de Exceltur sobrerendibilidade e emprego nos destinos turísticos españois. Mentres que no Estado detéctase unha retardación no primeiro cuadrimestre en canto á rendibilidade económica das actividades turísticas, “hai zonas do Estado, entre as que destaca a provincia de Pontevedra, cun gran incremento”, apuntou.
A mesma entidade destaca, ao analizar a rendibilidade, o perfil da provincia como destino de interior e cultural. “É un dos grandes cambios desde a nosa chegada, potenciar o interior da provincia e o turismo cultural. E está a dar moi bos resultados, do mesmo xeito que a chegada de visitantes desde o estranxeiro en parte pola mellora da conectividade aérea”, destacou Carmela Silva.
Por mar e aire
O vento sopra de cola para o aeroporto de Peinador, o que máis creceu de Galicia no primeiro semestre (un 9 %). A terminal viguesa conta actualmente con nove conexións nacionais e sete internacionais (estas últimas Lisboa, Londres, París, Milán, Dublín, Edimburgo e Bolonia).
O tráfico de cruceiros, onde o porto de Vigo é unha referencia, tamén vive un bo momento. O 48 % dos turistas que chegaron a bordo de transatlánticos a Galicia durante o primeiro semestre atracou na terminal olívica, líder en Galicia neste sector.
“Todos os datos son extraordinarios para a provincia de Pontevedra. Non se pode pedir máis con vistas a esta tempada de verán”, resumiu Carmela Silva.
