As salinas do Ulló, exemplo de explotación sustentable da natureza
O Concello de Vilaboa e a Asociación Salinas do Ulló están a traballar na posta en valor deste espazo, protexido pola Rede Natura 2000, que posúe un grande interese paisaxístico e histórico. Para dar a coñecer esta singular paraxe o municipio ofrece rutas guiadas pola zona, con reserva previa, para grupos de entre 5 e 50 persoas.
Entre as visitas recentes destaca a dos profesionais do Colexio de Arquitectos de Galicia, que celebraron o Día da Arquitectura alí ao considerar este conxunto etnográfico como unha mostra de convivencia harmónica entre a construción e o medio natural.
Os antecedentes das salinas do Ulló remóntanse ao reinado de Felipe IV no século XVII. Por entón, o sal era un recurso moi valioso xa que se utilizaba para a conservación de alimentos e mesmo podía chegar a usarse como moeda. Situadas na enseada de San Simón, as salinas comezaron a ser explotadas polos xesuítas de Pontevedra en 1694 en colaboración co mosteiro de Poio e o seu uso mantívose practicamente ata o século XX.
No mesmo lugar construíuse a finais do XIX un dos poucos muíños de mareas existentes en Galicia, que aproveitaba o movemento natural do mar para xerar forza hidráulica. Na actualidade a edificación desapareceu, pero aínda se poden ver as canles das comportas creadas para a súa utilización. Así mesmo, tamén se poden contemplar os diques das salinas e os restos das antigas vivendas dos xesuítas, coñecidas como a granxa das salinas.
Por outra banda, o espazo posúe un gran valor natural e por iso está incluído na Rede Natura 2000. Na zona fúndense catro ecosistemas: o bosque de ribeira, a carriceira, a marisma e a enseada, que acollen unha importante colonia de aves migratorias.
Todo o conxunto foi recuperado e dispón dun bo acceso, con aparcadoiro incluído, e unha senda que cruza e rodea as marismas.
Día Mundial da Arquitectura
A delegación de Pontevedra do Colexio de Arquitectos de Galicia celebrou o 2 de outubro o Día Mundial da Arquitectura cunha visita guiada ás salinas do Ulló, organizada en colaboración co Concello de Vilaboa. O colectivo profesional elixiu este emprazamento como exemplo de sustentabilidade na explotación dos recursos naturais, xa que a efeméride estivo dedicada este ano á loita contra o cambio climático.
Ao acto asistiron profesionais da arquitectura e representantes das administracións. Despois da visita guiada descubriuse unha placa conmemorativa.
