Chega ás Rías Baixas unha das probas máis duras do mundo, o Ironman
Xa se coñece a data do Tríatlon Ocean Lava na súa edición galega, elixindo o 29 de abril de 2018 para a súa celebración. O prazo de inscricións abriuse o 29 de novembro. A proba, unha das máis duras do seu estilo, volve ás Rías Baixas por segunda vez, elixindo como escenario a vila de Cambados.
O evento chega novamente da man de Kenneth Gasque, un triatleta con máis de dúas décadas de experiencia creando este tipo de probas e que introduciu en Lanzarote as series mundiais de Ironman hai 25 anos.
A edición galega é unha edición de Distancia Half, 1900 metros nadando, 80 km de ciclismo e 21 km de carreira a pé (Medio Ironman), e dará comezo a partir das 7:30 horas da mañá cunha limitación de 350 persoas participantes. Tanto o punto inicial como final da competición realizaranse en Cambados. A proba de natación desenvolverase nunha soa volta, mentres que a proba ciclista percorrerá parte da comarca do Salnés. Por último, a proba a pé ou correndo levará ás e os participantes ata A Illa de Arousa antes de volver ao seu punto inicial.
Ademais das dúas categorías principais, masculina e feminina, existe outra por clasificacións (sub23, veterano 1, veterano 2, veterano 3 e veterano 4). Para aquelas persoas que non poden participar pero desexan asistir, a organización anima a formar parte do seu equipo de voluntarios . E para todas as persoas participantes que se inician nos tríatlons, no seu blog ofrecen unha serie de consellos .
O Medio Ironman do Ocean Lava Galicia é unha das probas máis duras do mundo e con destacado recoñecemento internacional
A orixe desta competición Ocean Lava celebrouse en Lanzarote e agora en 2017 chegou a 10 países europeos, entre eles, ademais de España están Holanda, Gales, Ucraína, Portugal ou Montenegro. Segundo informan desde a súa páxina oficial, na actualidade gozan de ser "unha das competicións de longa distancia máis prestixiosas do mundo".
Esta non é a primeira "proba de ferro" que se realiza nas Rías Baixas. Unha proba similar en dureza foi a I Epic Race de Pontevedra, cuxo percorrido abarcou 550 quilómetros en tres sesións de Bicicleta Todo Terreo (BTT) e con 14.500 metros de desnivel positivo acumulado en setembro de 2017.
A competición actual elixiu un escenario perfecto polas condicións que ofrecen As Rías Baixas, cun clima amable para esa época do ano en augas do Océano Atlántico, que ademais están protexidas pola orografía das rías e ofrecen unha gran beleza natural.
