Máis de 12.000 persoas visitaron xa a exposición sobre os Guerreiros de Xi'an en Vigo
A exposición, de fama internacional, sobre os Guerreiros de Xi'an, que recalou en Vigo en decembro e permanecerá aberta ata o día 19 deste mes, atrae centos de persoas a diario á nave de El Tinglado, na zona portuaria da cidade, e son xa máis de 12.000 as persoas visitantes, segundo confirma a organización, que acudiron a internarse no mundo destas fascinantes figuras e a historia do exército do primeiro emperador chinés, Qin Shi Huang.
A exposición "Terracotta Warriors. The army of the first emperor of China" permanece aberta desde o 16 de decembro, e as fins de semana pasan ata 1.300 persoas polas instalacións. Entre outros atractivos, a exhibición reproduce o foso no que foron achados os guerreiros orixinais, representados na exposición por réplicas de 65 figuras a tamaño real.
Ademais, as persoas visitantes poden ver reproducións de cabalos, armas, xoias e ferramentas, xunto con elementos interactivos e un diorama (escena recreada en 3D) que trasladan o espectador de maneira sorprendente á escavación orixinal. Un interesante documental exponlle os antecedentes e referencias necesarias ao público.
A exposición, organizada polo diario Faro de Vigo e na que colabora, entre outras institucións, a Deputación de Pontevedra, forma parte dunha xira internacional que xa percorreu varias cidades europeas e que, no seu paso por España, convocou máis de 400.000 persoas. Os soldados son un conxunto de máis de 8.000 figuras enterradas na China central preto do novo emperador Qin Shi Huang nos anos 210-209 antes de Cristo. En 1974 foi achada por casualidade a primeira cabeza, e progresivamente quedou ao descuberto en tres fosas este tesouro de valor patrimonial e histórico incalculable.
Aínda queda moito por saír á luz. O actual mausoleo real segue intacto e só cando se garanta a conservación das pinturas e a sensibilidade dos vernices se abrirá ao público. Os Guerreiros de Xi'an son Patrimonio da Humanidade desde 1987, e os seus escavadores oficiais, un equipo coa arqueóloga Xu Weihong á fronte, recibiron o Premio Príncipe de Asturias 2010 en Ciencias Sociais. Portavoces da organización da exposición en Vigo destacan que "tivo unha gran acollida entre público de todas as idades e veu xente das catro provincias de Galicia". Engaden que "cos elementos ambientais buscouse crear unha atmosfera que mergulle ao visitante na historia".
O horario de visita é de martes a xoves, de 18:00 a 21:00 horas; o venres, de 16:00 a 21:00 horas; e os sábados, domingos e festivos, de 11:00 a 14:00 horas e de 16:00 a 21:00 horas.
