Mostramos os municipios onde pasar a noite en caravana
O turismo de autocaravana, que aínda que minoritario no noso país, comeza a atraer turistas ás nosas terras. Así, o Concello de Pontevedra comunicou que nos últimos 3 meses, desde o 18 de maio ao 31 de agosto concretamente, deixou no municipio máis de 100.000 €, contabilizando entre 665 e 800 os vehículos desta categoría que fixeron uso do espazo de Tafisa. Terreo que conta con 20 prazas e 1.052 metros cadrados nunha contorna urbana. Entre o resto de datos que ofrecen desde o concello, indican que cada vehículo trae unha media de 3 persoas e o gasto medio é de 50 euros día por persoa ou 150 por autocaravana, ademais de destacar que o máximo permitido de pernoita é de 72 horas.
E é que a autocaravana é outra forma de percorrer o mundo. Unha forma de viaxar que permite a turistas moverse libremente sen ataduras de aloxamento nin horarios. Decidir cando e onde durmir, cando e onde comer. A diferenza dos toques de queda para abandonar ou acceder a algún aloxamento, agora os viaxeiros e viaxeiras son os donos dos seus horarios e deciden cando chegar e cando partir, e todo o tempo gozando do confort que lle proporciona moverse no que durante uns días será a súa casa.
Na cidade de Pontevedra deixou 100.000 euros en tan só tres meses
Unha facilidade de desprazamento que só na provincia de Pontevedra conta con polo menos 18 áreas públicas, 2 privadas, 4 áreas en ruta, 2 espazos máis en cámpings e outros 2 aparcadoiros con dereito a pasar a noite segundo ofrécennos páxinas especializadas como AreasAc ou ACA (Asociación Galega de Autocaravanas ). Entre todas elas, 14 son de costa, e o resto de interior, con 4 en municipios na ribeira do Miño. E entre os que posúen máis dun espazo atopamos Agolada, Cangas, Vila de Cruces e Vilagarcía de Arousa , todas elas con dúas estacións, e Sanxenxo con tres.
O resto de espazos públicos serían os de Arbo , Arcade, As Neves, Dena (Meaño), Forcarei, Mondariz, Poio, Ponte Caldelas , Redondela, Salceda de Caselas , Salvaterra de Miño e Tui. Entre as áreas de ruta está A Estrada ademais da antes mencionada Agolada e nos aparcadoiros atopamos os de Vigo e A Illa de Arousa que recentemente obtivo 23 prazas exclusivamente para estes vehículos.
Entre as preguntas frecuentes e consellos que se poidan ofrecer para as persoas que se van a iniciar a viaxar desta maneira destacamos que o carné B é suficiente para poder conducilas, é aconsellable calcular as reservas de auga necesaria por persoa e día, así como saber como baleirar as augas grises e negras e ser conscientes de que está prohibido facelo fóra dos espazos habilitados para iso. Tamén é aconsellable saber como cambiar a bombona por se fose necesario. Sacar cadeiras ou estender toldos nas estacións considérase acampar e por tanto non está permitido. E sobre todo, goza da túa viaxe e por suposto respecta aos teus novos veciños e as contornas que percorres.
