Muiñada, magosto e samaín en Sabucedo
Sabucedo é coñecida pola súa popular Rapa das Bestas, que aínda que na actualidade se converteu nunha atracción cultural, foi unha tradición en diferentes municipios de Galicia ata anos recentes. O obxectivo, reunir aos cabalos que deixan libremente no monte para cortarlles as crinas e, anteriormente, para marcalos.
Agora volvemos a esta parroquia da Estrada, ao norte de Pontevedra, con motivo da Musa de Sabucedo. Un día de rutas, mercados, talleres e lendas o 28 de outubro.
Organizado pola asociación de veciños local e Rapa das Bestas de Sabucedo, toma como referencia a festa e tradición máis enxebre de Galicia, evocando o magosto outonal, as antigas muiñadas e a maxia do samaín.
Celebrado nalgunhas zonas de Galicia, o primeiro, o magosto, refírese ao festexo no que se rende tributo á castaña, a súa recollida, a súa comuñón co lume e, nalgúns lugares, o seu vínculo cos mortos como outrora. Na actualidade rodéase de xogos, que gozan especialmente as e os máis pequenos nos colexios.
A Musa de Sabucedo devólvenos a tradición máis enxebre de Galicia, evocando o magosto outonal, as antigas muiñadas e a maxia do samaín
As muiñadas devólvennos á vida no rural, onde moitos actos eran escusa para ter celebracións. O pobo reuníase para moer os cereais nos muíños, e aproveitaba esas noites para festexar en compañía.
O samaín envólvenos na Galicia máis máxica. De raíces celtas e mesturado de tradición galega, a festa pagá terminou converténdose na actual celebración de Todos os Santos, e preséntase agora como unha alternativa ao xa estendido Halloween.
En canto ao programa, comeza o sábado 28 ás 10:30 horas da mañá cunha ruta comentada polos camiños da zona, cun percorrido de 10 quilómetros. Ás 12:00 da mañá ábrese o Mercado de Outono, e ás 13:00 horas comezan os talleres no muíño do Mestre. Todo acompañado de música e unha comida con produtos de Tabeirós-Terra de Montes.
Talleres similares de pan, filloas e cogomelos volverán ás 16:30 horas. Os das 17:00 están dirixidos aos máis pequenos, mentres que ás 18:00 espérase unha degustación da feiticeira queimada. E como non podía faltar nunha noite máxica, unha procesión da Santa Compaña está programada para as 19:30, seguida da Noite de Samaín unha hora máis tarde xunto co magosto. A música continuará de novo a partir das 22:00.
