O centro CastroDeza organiza, durante todo o ano, obradoiros para coñecer a vida dos castrexos e castrexas da comarca de Deza
O centro CastroDeza, que inaugurou hoxe a presidenta da Deputación de Pontevedra, Carmela Silva, e que abrirá as súas portas ao público mañá sábado 5 de novembro, organiza ao longo do ano diversas actividades que permitirán que todas as persoas que visiten o centro coñezan diversas facetas do día a día dos homes e mulleres castrexas e tamén as singularidades desta época na comarca de Deza.
CastroDeza forma parte do proxecto "Centro virtual da cultura castrexa", desenvolvido pola Deputación conxuntamente co último proxecto de ampliación do Museo de Pontevedra, co fin de poñer en valor o patrimonio cultural da provincia e dar maior alcance á cultura castrexa como instrumento de dinamización.
Para dotar o centro dun maior dinamismo e dunha maior oferta cultural, CastroDeza organiza unha serie de obradoiros ao longo de todo o ano, un complemento ideal ás visitas, combinando unha parte máis didáctica con outra de eido lúdico e experimental, coa temática común da cultura castrexa e a comarca de Deza. Para participar nas visitas e nos obradoiros é preciso reservar previamente no teléfono 986 781 608 ou en castrodeza@depo.es. Nos obradoiros requírese a participación de catro persoas como mínimo. Estes cursos, cunha duración estimada de 40 minutos, adáptanse tanto ás idades coma aos intereses e ás necesidades das persoas participantes.
Os obradoiros que se ofertan son: "Guerreiros de Deza", no que as persoas asistentes poderán coñecer o significado de diversos obxectos que formaban parte da vestimenta dos guerreiros da Idade de Ferro e tamén experimentar con eles; "Laboratorio castrexo", no que poderán descubrir os diferentes pasos polos que pasan as pezas arqueolóxicas desde que son descubertas ata que se colocan nunha vitrina dun museo; "Alumea no poboado", no que aprenderán a controlar o lume, que é o único dos catro elementos da natureza capaz de congregar ao seu arredor a comunidade humana e contribuír ao seu desenvolvemento como sociedade; "Fusaiola e liño", no que poderán probar o traballo con teares, unha actividade moi vencellada aos castrexos e castrexas; "O bosque animado", no que poderán coñecer a simbiose entre o ser humano e a paisaxe; e, por último, "No San Martiño, pan e viño", no que poderán descubrir en que consiste unha tradicional porco killing galega, coñecer os produtos e pratos máis prestixiosos da comarca de Deza e deixar a súa pegada con innovadoras propostas.
CastroDeza organiza tamén visitas guiadas (baixo o mesmo sistema e vías de reserva previa), individuais ou en grupo, duns 45 minutos de duración, nas que as persoas que o soliciten poderán percorrer as exposicións, acompañadas dun ou dunha guía especializada, e coñecer os principais recursos de Deza, unha comarca profundamente marcada pola cultura castrexa. CastroDeza tamén lles ofrece aos centros escolares un programa de actividades didáctico e ameno, adaptado ás necesidades e particularidades de cada grupo e nivel educativo. Estas actividades están deseñadas para estimular a imaxinación e a curiosidade do alumnado. Preténdese que os rapaces e rapazas acaden novos coñecementos, pero tamén que gocen da experiencia e que poidan aprender divertíndose. As persoas que o desexen tamén poderán facer unha visita autónoma, para a que na recepción recibirán as indicacións necesarias para visitar o espazo expositivo de maneira libre e cun folleto con información complementaria.
