O Curtas Film Fest, un festival de carácter internacional
Esta mañá presentouse en Vilagarcía de Arousa a 44.ª edición do Curtas Film Fest, que comezará as proxeccións o vindeiro luns 24 de outubro e xirará arredor do mundo do cómic. Na presentación, que tivo lugar na rúa da Baldosa, participaron a concelleira de Cultura da localidade, Sonia Outón; o presidente da Asociación Film Fest, Antonio Castro; o director do certame, Luis Rosales; e o deputado provincial de Cultura e Lingua, Xosé Leal. O deputado salientou que "este festival é un dos que decidimos incluír nos patrocinios con motivo do Ano Castelao por ser un dos catro certames audiovisuais de referencia da provincia, que, ademais, conta coa particularidade de ser o máis lonxevo". Xosé Leal aproveitou para sinalar que "estamos vendo que, non só a nivel provincial senón a nivel de toda Galiza e do Estado, neste ámbito contamos con colectivos na provincia que están a organizar certames de carácter internacional, que estamos exportando e que podemos usar como escaparate".
O cómic centra, ademais, actividades paralelas ás propias proxeccións, coma exposicións, obradoiros e presentacións de libros. Neste sentido, a concelleira de Cultura asegurou que "a exposición –que abriu o 6 de outubro– foi un éxito de público e isto xa nos pode dar unha pista do exitazo que esperamos que sexa esta edición do festival". Tamén no contexto do Ano Castelao o departamento provincial de Cultura levou a Vilagarcía a exposición "De Castelao ao mañá: unha ollada ao cómic galego", que puido visitarse na sala de exposicións do Auditorio ata o 8 de outubro, unha mostra que, en palabras do deputado provincial, "foi unha actividade coa que quixemos complementar a oferta do Concello". A mostra referenciaba o labor de Castelao nun campo que, hoxe máis ca nunca, conta cunha importante representatividade de autoras e autores galegos que están a traballar neste eido con moito éxito e calidade.
No marco das proxeccións audiovisuais o Curtas Film Fest tamén proxectará Miss Ledya, a primeira curta de ficción galega, dirixida en 1916 por José Gil e na que participou cun papel secundario o propio Castelao. A proxección contará con música en directo creada exclusivamente para esta sesión. A curta poderá verse no acto de entrega de premios, que se desenvolverá o sábado 29, ás 21:00 horas, no Auditorio, no que tamén se proxectarán as curtas gañadoras do certame.
Pola súa banda, o presidente da Asociación Film Fest agradeceu o apoio decidido das administracións local e provincial e manifestou que seguirán a traballar para asegurar a continuidade do festival. O director puxo o foco na diversidade de actividades incluídas na programación. As proxeccións terán lugar entre os días 24 de outubro e 1 de novembro; tanto as curtas coma o resto das actividades serán de acceso gratuíto.
