Praias fluviais para un verán refrescante
De norte a sur, a provincia de Pontevedra conta con numerosas alternativas para as persoas que prefiren gozar da auga doce nas xornadas de calor. Gozar dun pracenteiro baño na ribeira dos ríos Miño, Deza, Lérez ou Valga, entre outros, pode converter o noso día nunha estupenda oportunidade para gozar da familia ou as amizades e desconectar da rutina do día a día á beira das numerosas praias fluviais de Rías Baixas con espazos para o lecer e a diversión.
Ecosistemas incluídos na Rede Natura 2000
Na beira do río Deza, atopamos a praia fluvial da Carixa, unha grande proposta de lecer en Vila de Cruces que ademais conta con piscinas públicas. Tamén en Vila de Cruces poderemos visitar Abeseiro de Toiriz, con dúas zonas de baño para as e os adultos e para pequenos integradas no espazo natural Os Sobreirais do Arnego. O Deza tamén é o protagonista en Pozo do Boi (Lalín), cun robledal próximo ideal para comidas campestres e con zona de xogos.
De grande interese paisaxístico é a praia de Liñares, un espazo na Estrada ideal para o baño e o xogo, do mesmo xeito que O Areal de Berres. Nunha pequena presa do río Valga atopamos a praia da Ponte, con área de area, zona arborizada, merendeiros, espazo infantil de xogos e pistas deportivas. E próximo á desembocadura do río Ulla poderemos descubrir a rica flora e fauna de ecosistemas de grande valor ecolóxico, incluídos na Rede Natura 2000 e coa súa propia área recreativa, Vilarello, pensada para o lecer das e os visitantes.
Areal Berres, A Estrada
Pozo do Boi, LalínA Calzada, en Ponte Caldelas, é a única praia fluvial con bandeira azul en España
A praia da Calzada é a única proposta fluvial con bandeira azul de España, un galardón que mantén desde 2015 esta zona de baño de Ponte Caldelas formada por unha presa de pedra nun bosque na que os bidueiros, castiñeiros e carballos converten o baño nunha experiencia excepcional. Próxima atópase a praia de Cerdedo, que permite gozar das augas do río Lérez e gozar ademais dunha piscina para as e os máis pequenos da casa. Máis ao sur e próxima a Fornelos de Montes e regada polo río Oitavén, a praia fluvial de Ponte Vilán conta cunha pequena área de recreo.
Un pequeno embarcadoiro é o punto de acceso á zona de baño de Cabanelas, a beiras do río Umia, que ao seu paso por Meis proporciona un excepcional espazo de repouso con fervenza, Pago Negro, ideal para as e os amantes do piragüismo. O mesmo Umia nutre tamén de cristalinas augas o espazo de Pontearnelas, en Ribadumia, mentres que o Verdugo debuxa ao seu paso por Pontevedra o areal de Pontesampaio. Tamén na cidade do Lérez poderemos mergullarnos en Monteporreiro, unha contorna semi urbana con multitude de servizos para goce das e os bañistas.
A Calzada, Ponte Caldelas
Monteporreiro, PontevedraRutas de sendeirismo, muíños e espectaculares vistas completan a oferta
Próxima a un muíño restaurado atópase a praia fluvial de Luneda, na Cañiza, un espazo con zonas diferenciadas de baño para nenas e nenos e para as e os adultos. Tamén de grande atractivo é o espazo da Maceira, en Covelo, situado na intersección dos ríos Fofe e Tea e próximo a un pequeno illote con árbores de grande beleza. Xa nas Neves, poderemos visitar Santa Mariña ou a praia fluvial de Portomaior, que forma parte do Carreiro dos Pescadores, unha ruta de 3,5 quilómetros pola que observar diferentes especies arbóreas autóctonas, varias pesqueiras ou antigos postos de vixilancia do contrabando.
Luneda, A Cañiza
Maceira, CoveloCoas súas propias zonas de lecer con merendeiro e praia fluvial e de pesca, a praia fluvial de Sela é unha estupenda alternativa a beiras do río Miño e moi próxima ás de San Xoán e Arbo, con augas puras e un fermoso paseo con espectaculares vistas panorámicas. Máis ao oeste, en Ponteareas, atoparemos o areal da Freixa, situado nun lugar tranquilo ideal para a desconexión no que practicar todo tipo de actividades deportivas; ou os espazos verdes das Partidas, Os Remedios e da Moscadeira, tres estupendas zonas de baño nas proximidades do río Tea.
Coñecido pola súa popular oferta termal, o concello de Mondariz alberga tamén espazos para o baño como O Val e a práctica do nudismo como a área de Ceo, rodeada dunha fermosa vexetación. Máis ao sur, na histórica localidade de Tui atoparemos a contorna de Areeiros ou as tranquilas augas da praia fluvial de Penedo. E xa na desembocadura do Miño, na Guarda, poderemos visitar A Lamiña, rodeado dun tranquilo piñeiral, e o areal de augas tranquilas do Codesal .
San Xoán, Arbo
A Lamiña, Tui
