Ponte Caldelas inaugura o Sendeiro dos Tres Montes, un itinerario que suma 40 quilómetros de percorrido e permite gozar do seu patrimonio natural e histórico
Ponte Caldelas acaba de inaugurar o Sendeiro dos Tres Montes, que conecta entre si tres rutas xa existentes. Así, queda interconectado o Sendeiro Azul cos de San Vicente e As Almiñas. Esta nova ruta, enmarcada no proxecto Sendeiros en Rede, permite agora coñecer, máis en profundidade, este municipio pontevedrés, coñecido polo seu patrimonio forestal, fluvial ou histórico. Con esta incorporación proponse un total de 40 quilómetros de percorrido por Ponte Caldelas, a través dun itinerario que se prevé, ademais, sinalizar mediante unha imaxe conxunta e promover a través de folletos explicativos.
Así, se ata o momento as rutas denominadas Sendeiro Azul, Sendeiro de San Vicente e Sendeiro das Almiñas se percorrían de modo independente, o Sendeiro dos Tres Montes vén cubrir o espazo existente entre elas, enlazando as tres e propoñendo novos puntos de partida para coñecer esta zona de Ponte Caldelas. Neste sentido, desde o Concello sinálase que a opción máis sinxela para iniciar o seu percorrido é o centro urbano. A continuación, o visitante poderá descubrir espazos singulares coma a serra de Castrelada, o miradoiro do monte de Castelo ou os camiños de Sorreira, Roriz, O Castelo ou Pedra do Cervo.
Tres propostas
Respecto das rutas xa existentes, o Sendeiro Azul é unha ruta circular de 8,3 quilómetros que ten como punto de partida o centro urbano e a praia fluvial da Calzada. Continúa pola ribeira do río Verdugo, cruzando os coñecidos pasos de A Fraga. Pola súa banda, o Sendeiro de San Vicente –que parte tamén do centro urbano e ten unha extensión de 12 quilómetros– percorre Quintán e transita polo camiño da Torre, Gradín, Barcala, o camiño dos Muíños ou o de Paradela para terminar nos petróglifos de Tourón. Finalmente, a Ruta de Almiñas –de máis de 10 quilómetros de percorrido- rodea Laxoso de Arriba e de Abaixo, conecta con Portasouto e segue, ao outro lado do Verdugo, ata Caritel. Permite coñecer dous petos de ánimas e camiños tradicionais nun itinerario moi próximo ao Foxo do Lobo de Laxoso.
