Pontevedra abre este sábado o seu programa de Entroido, con máis dunha vintena de actos en cartel
Está todo preparado. Un dos festexos de Entroido que maior afluencia de público recibe en Galicia, o de Pontevedra, abre esta fin de semana o seu programa de actividades. Durante practicamente un mes a cidade renderase á sátira e á ironía. En múltiples facetas.
Unha representación do Entroido tradicional é a encargada de marcar o inicio das festas. Será este sábado, ás 12:00 horas, cun pasacalle a cargo das madamas e dos galáns de Cobres (Vilaboa). Declarada de interese turístico, esta manifestación destaca tanto pola súa danza como polo colorido das súas vestimentas.
O venres seguinte, o día 24, as actividades comezan, ás 20:00 horas, cunha degustación de filloas de Entroido na praza da Ferraría. Neste mesmo espazo procederase á recepción do rei da festa, Urco, que chegará acompañado do seu séquito e das comparsas Os Canecos, Amoriños de Bora, Las Flores del Carnaval, Os Solfamidas e Os Paparrulos. A lectura do pregón é, como cada ano, un dos momentos máis esperados. Polo momento aínda non transcendeu quen se encargará de entoalo.
Ao día seguinte o Entroido deixarase sentir desde moi cedo, pois Os Canecos ofrecerán un pasacalle desde as 11:00 horas. Xa pola tarde terá lugar o tradicional desfile de Entroido, que parte da rúa José Malvar e percorre Loureiro Crespo, Benito Corbal, Peregrina, Michelena, praza de España e a rúa Alameda para terminar na praza da Ferrería, onde se entregarán os distintos premios.
Xa o luns 27 de febreiro o III Campamento Urbano Entroido Pirata toma a remuda. Obradoiros de xogos e disfraces conforman o aperitivo doutro dos actos máis recoñecidos deste Entroido, o que ten como protagonista o loro Ravachol. Será, a partir das 19:30 horas, na praza da Peregrina, coa recreación da botica de don Perfecto Feijóo e a actuación de Comando Foucellas. Máis tarde, o Pazo da Cultura será escenario da primeira eliminatoria do XXVI Concurso das Murgas.
O martes, última xornada do mes, repite o Entroido Pirata como dinamizador da mañá. Para a tarde está prevista a XXII Festa da Filloa, co seu concurso. Ademais, seguirá o campamento infantil pola tarde para dar paso á Noite Pirata, co desembarco da tripulación de Burla Negra no centro histórico. Ao día seguinte, festivo local na cidade, desde as 17:00 horas, poderase participar no obradoiro As Máscaras de Ravachol, na praza da Peregrina, así como en actividades musicais ou na recuperación do Entroido tradicional de Campañó. Ás 19:00 horas procederase á recreación da botica de don Perfecto Feijoo. A ambientación será a cargo da aula de Teatro Municipal e de persoeiros relevantes da época na cidade. Actuará o Coro e, ás 21:00 horas, no Pazo da Cultura, terá lugar a segunda eliminatoria do XXVI Concurso das Murgas, cuxa final terá lugar ao día seguinte.
O primeiro venres de marzo reserva espazo para a actividade Entroido, Filloas e Fogóns, no Teatro Principal, a XXII Mostra da Parodia do Entroido e a entrega de premios da XXII Mostra da Parodia do Entroido. Na xornada posterior actuarán Foula e Os Alegres e, ás 18:00 horas, terá lugar o comezo do Velorio de Ravachol na sala mortuoria, para o que se prega asistencia de loito rigoroso. O cortexo fúnebre partirá, ás 21:00 horas, da praza da Verdura, co seu séquito e comparsas. A comitiva percorrerá San Román, Ferraría, paseo Antonio Odriozola, Soportais, Manuel Quiroga, Princesa, Sabela II, rúa Real, Sarmiento, Pasantería e praza da Ferraría. Neste caso a Velada Infausta contempla honras fúnebres, coa lectura da necrolóxica do defunto, así como a danza da morte, a saeta val do Lérez e a incineración do loro Ravachol.
Deseño do cartel
Por outra banda, cómpre sinalar que a gastronomía destaca como o elemento principal do cartel do Entroido 2017 en Pontevedra. Ideado polo artista Dim Matamoro e o debuxante Kiko da Silva, mostra un Ravachol conformado por pan, aceite de oliva virxe e perexil.
