Presumido: ecos máxicos en Vigo, a capital do deporte urbano
Atardece na baía de Vigo e a vibrante cidade portuaria parece quedar en calma. A melodía de Presumido, grupo galego de música electrónica, enche a atmosfera de reverberacións máxicas na seguinte parada das Sesións Rías Baixas, un formato de Flooxer en colaboración con Turismo Rías Baixas que esta semana fai escala en O Marisquiño, festival de deporte e cultura urbana que pisa forte no panorama internacional e forma parte do circuíto Rías Baixas Fest.
O son onírico de Presumido, cos grandes guindastres portuarios como paisaxe de fondo, é o contrapunto ao puxante pulso desta cidade que entre o 10 e o 12 de agosto volverá reunir aos mellores “riders” do mundo nun evento que atrae xa a máis de 160.000 persoas. Dúas probas de copa mundial de Skateboarding, unha de FMB Dirt Jump e competicións doutras disciplinas como MTB Downtown, BMX, Flatland ou Motocrós toman a zona central do porto, onde tamén se celebra o campionato de break dance, concertos, exhibicións de graffiti e torneo de basket 3x3. Un paraíso para os amantes do deporte extremo e a cultura urbana.
Vigo loce con orgullo as súas costas, que deparan un dos grandes espectáculos de O Marisquiño, a vertixinosa baixada MTB desde O Castro, –o céntrico monte custodiado por unha fortaleza que domina a ría de Vigo–, ata o porto a través das sinuosas rúas do centro histórico.
O barrio histórico bole coa súa oferta hostaleira, O Castro ofrece fabulosas vistas á ría e as Illas Cíes foron bautizadas como o “caribe europeo” polas súas praias paradisíacas
A antiga vila mariñeira do século XVIII converteuse na maior urbe de Galicia. O seu centro histórico, restaurado nos últimos anos e cunha ampla e apetitosa oferta hostaleira, debuxa calquera fin de semana unha perfecta radiografía do dinamismo e a puxanza de Vigo. As ostreiras preparan no momento este manxar ao natural para servir a vigueses e visitantes, e os locais serven saborosos petiscos, peixes, mariscos, albariño e outros produtos con materia prima das Rías Baixas. A praza da Constitución ou o Náutico son lugares perfectos para tomar un descanso e gozar do ambiente da cidade.
O centro urbano loce nobres edificios de diferentes escolas arquitectónicas desde o século XIX ata hoxe, unha ampla oferta cultural e belos miradoiros á ría de Vigo. A fortaleza do Castro é lugar de visita obrigada, e para gozar dun oasis no medio da cidade resulta moi recomendable un paseo polo parque de Castrelos, de gran riqueza botánica e cun fermoso pazo do século XVII como aceno de identidade.
Samil é a gran praia de Vigo, con equipamentos deportivos e de lecer, un paseo marítimo desde o que admirar a ría de Vigo, e unha contorna de areais galardoados con bandeira azul pola súa calidade e servizos.
As Illas Cíes emerxen maxestosas custodiando as dúas beiras. A xoia do Parque Nacional das Illas Atlánticas é un paraíso bautizado de forma recorrente pola prensa especializada como o “caribe europeo”. A praia de Rodas, unha lingua de area fina que une dúas das illas do arquipélago, foi considerada polo diario británico The Guardian como a mellor do mundo. Varias navieiras realizan transporte regular e excursións a este lugar idílico.
Samil é o enclave perfecto para observar o atardecer na ría de Vigo mentres Presumido pon a banda sonora á posta de sol cos seus ecos máxicos. En menos de tres meses os mellores “riders” do mundo congregaranse de novo para realizar malabarismos extremos nesta cidade vibrante, que se converterá, un ano máis, na capital europea do deporte urbano.