Publicadas as datas do próximo Atlantic Fest 2018
O celebrado festival Atlantic Fest da Illa de Arousa, un dos 6 festivais enmarcados nos RíasBaixasFests, acaba de publicar as datas nas que celebrará os concertos na tempada de 2018. Os días elixidos son o 20, 21 e 22 de xullo, aprazando en tres semanas a súa data habitual.
O motivo deste cambio, segundo informan desde a organización, débese a que buscaban unhas datas máis idóneas para que se poida gozar mellor da illa, sendo ademais a terceira semana de xullo unha das épocas que pode atraer a máis público.
Xunto con esta noticia, desde o 11 de decembro xa se poden obter os pases para a próxima edición a través da súa páxina oficial. Para todas as persoas que se fagan cunha entrada antes do 7 de xaneiro, o prezo será de 40 €, e o paquete inclúe unha serie de agasallos coincidindo con estas datas do Nadal, como un cartón desconto Atlantic Days 2018 e agasallos de patrocinadores. Todo ata esgotar stock. Para compras grupais, cada usuaria ou usuario poden obter ata un máximo de 10 entradas por transacción.
A partir do 7 de xaneiro, o custo será de 45 € (máis gastos de xestión). Este segundo tramo durará ata as 9:00 horas do 7 de marzo, cando se pasará ao tramo 3 e o prezo elevarase aos 50 € (máis gastos de xestión). O tramo 4 comezará a partir do 15 de maio ás 9:00 horas e ata o 19 de xullo ou esgotar entradas cun custo de 55 € (máis gastos de xestión). A adquisición en despacho de billetes das mesmas ascenderá aos 60 €, exceptuando as persoas menores de 12 anos que están exentas de pagar entrada.
O festival pode presumir de ser nomeado ao mellor festival de Medio Formato e ao Mellor Festival Revelación nos Premios Fest
En canto ao cartel, irase dando a coñecer conforme avancen as semanas e o novo ano, onde a edición anterior tivo unha programación de luxo e no que o festival foi daquela o primeiro en dar o pistoletazo de saída dos Festivais Rías Baixas ou #RíasBaixasFests como se coñecen nas redes sociais. Cada un deles emprazado nunha localidade galega diferente para diversificar a programación cultural ao redor de toda a provincia. Localidades que durante uns días convértense no centro musical da costa sur galega, como Bueu, Nigrán, San Simón en Redondela, Vilagarcía de Arousa ou Caldas de Reis, e baixo escenarios con fondos naturais envexables como no propio caso do Atlantic Fest na Illa de Arousa.
O festival pode presumir de ser nomeado ao mellor festival de Medio Formato e ao Mellor Festival Revelación a nivel nacional dentro dos Premios Fest e xunto a outros 8 nomeamentos entre as que se atopan: Mellor campaña de comunicación, Mellores actividades paralelas, Mellor zona de Acampada, Mellor directo nacional: Os Planetas, Mellor directo internacional: The Temper Trap. Actualmente, está nomeado xunto o PortAmérica nos Iberian Festival Awards e no que todas e todos os internautas están convidados a participar coa súa votación.
