Rapa das Bestas e outras cinco festas ineludibles en xullo nas Rías Baixas
A Festa da Lagosta e a Cociña Mariñeira na Guarda, xunto á da Vieira en Cambados e a do Carneiro ao Espeto en Moraña, deleitarán os padais de todas e todos aqueles que se animen a vivir o mes de xullo nas Rías Baixas. Tamén haberá lugar para as crenzas relixiosas, xa que San Benitiño de Lérez e o Santísimo Cristo dos Aflixidos de Bouzas serán homenaxeados en Pontevedra e Vigo respectivamente. A estrela principal deste particular menú para vivir un verán memorable na provincia de Pontevedra será a Rapa das Bestas, unha nova cita coa tradición no curro de Sabucedo.
Rapa das Bestas de Sabucedo (A Estrada)
Do 5 ao 9 de xullo a pequena parroquia de Sabucedo, na Estrada, converterase un ano máis en lugar de peregrinación para quen están dispostas e dispostos a deixarse seducir pola beleza dunha loita case coreografiada entre a ansia de liberdade dos cabalos e a forza e maña de aloitadoras e aloitadores. As verbenas populares e o Festival Rapasóns, con Davide Salvado, os Festicultores ou o jazz na rúa de La Rúe entre outros, poñerán banda sonora a esta tradición xurdida da ofrenda de dúas irmás a San Lorenzo para evitar que as súas dúas eguas morresen a mans da peste.
Tras unha gala inaugural o xoves, a festa propiamente dita comezará o venres coa saída desde O Celeiro para buscar ás “bestas”, ata xuntar ás “greas” (mandas) para a súa “ baixa” (baixada) cara ao peche do Castelo. O sábado terá lugar a subida ao monte para buscalas e proceder á primeira rapa de crinas de eguas e cabalos no curro, feito que se volverá a repetir o domingo e o luns cun terceiro curro esta vez solidario, xa que se doará a recadación a distintas causas benéficas. Na tarde do día 9 chegará o broche final, coa liberación das mandas de Sabucedo cara ao seu fogar, os montes estradenses.
Festa da Lagosta e a Cociña Mariñeira (A Guarda)
O mesmo fin de semana que Sabucedo vivirá a súa festa de interese turístico internacional, A Guarda acollerá a Festa da Lagosta e a Cociña Mariñeira, declarada de interese turístico de Galicia grazas á calidade da súa oferta gastronómica. Con vistas ao mar que nos regala os produtos que logo gozaremos na mesa, os días 6, 7 e 8 de xullo poderemos degustar lagosta a 25 euros, acompañándoa doutras viandas mariñas como percebes, nécoras, camaróns, luras, luriñas e navallas e viño con Denominación de Orixe Rías Baixas.
Co pregón e actuación do recoñecido humorista e actor Nancho Novo darase o pistoletazo de saída o venres a unha festa que, ademais das tradicionais degustacións, completarase con actuacións musicais para todos os gustos, obradoiros infantís de maxia e cociña, inchables acuáticos, unha feira de artesanía e a XXIII Travesía a nado do porto da Guarda. Todo pensado para que persoas maiores e menores gocen ao máximo e vivan un verán inesquecible cheo de risas e diversión.
Festas de San Benitiño de Lérez (Pontevedra)
(Se vas a San Benitiño,/ non vaias ao de Paredes,/ que hai outro máis milagreiro,/ San Benitiño de Lérez ). Con este canto popular hónrase ao santo con fama de conceder máis milagres, San Benito, que celebra o seu día grande en Pontevedra cada 11 de xullo na igrexa de San Salvador de Lérez, un antigo mosteiro beneditino con elementos barrocos e neoclásicos cuxos orixes se remontan a finais do século IX.
Co fin de curar enfermidades da pel, especialmente verrugas e pústulas, as e os fieis realizan habitualmente dous rituais: untarse co aceite milagroso, bendicido e queimado nunha pota de cobre, e pasar por baixo do altar do santo. Tamén son frecuentes as ofrendas de velas e figuras coa forma da parte do corpo da que se busca sanación, ademais de pasar pola figura do santo un pano que despois se fregará contra as zonas que necesitan da intercesión divina para ser curadas.
Das augas máis profundas emerxe a vieira, un dos produtos estrela das mesas galegas e a protagonista absoluta da festa que ten lugar todos os anos a mediados de xullo en Cambados. A exaltación deste molusco bivalvo, declarada de interese turístico de Galicia en 2013, congrega a decenas de miles de persoas na carpa do paseo da Calzada, dispostas a gozar coa degustación deste manxar mariño obtido grazas ao bo oficio da xente do mar de Cambados.
A orixe destas xornadas remóntase a 2002, tras a alianza da Confraría de pescadores de Santo Antonio e o concello, servindo na actualidade de antesala a outra festa de interese turístico da localidade, neste caso internacional, a Festa do Albariño, a maridaxe perfecta para este molusco. É ademais frecuente identificar a vieira coas persoas peregrinas que ano a ano asumen o reto de percorrer o Camiño a Santiago, pois xa desde a antigüidade levaban a súa cuncha aos seus países de orixe para demostrar que alcanzaran as terras galegas.
Festa do Santísimo Cristo dos Aflixidos de Bouzas (Vigo)
O barrio vigués de Bouzas conmemora o terceiro domingo de xullo unha traxedia marítima sucedida fai catrocentos anos. Despois de afundirse un barco en augas próximas, as veciñas e veciños decidiron sacar en procesión a imaxe do Santo Cristo e paseala polas rúas coas luminarias da época para que a luz servise de guía aos náufragos que loitaban pola súa vida. Esa mesma luz, reconvertida nun espectacular despregamento de pirotecnia, guía na actualidade ás e os visitantes para gozar desta celebración de gran renome.
A festa do Santísimo Cristo dos Aflixidos de Bouzas, celebrada desde 1861 e declarada de interese turístico de Galicia en 2004, é unha cita imprescindible para toda a familia. Postos de atraccións, música, desfiles de cabezudos, actividades e concursos para todas as idades, competicións, as tradicionais procesións e os clásicos fogos artificiais que enchen de cor a ría de Vigo a noite anterior conforman un plan perfecto para que persoas maiores e pequenas váianse ás súas casas cun gran recordo.
Festa do Carneiro ao Espeto (Moraña)
Celebrada desde 1969 o último domingo de xullo, a orixe da Festa do Carneiro ao Espeto remóntase aos anos vinte, cando un morañés preparaba comidas campestres nas beiras do río Umia, asando carneiros ao estilo “pampeiro”, tal e como aprendese tras emigrar a Arxentina. Anos despois, o éxito desta iniciativa converteuse nunha tradición en todas as festas da zona e levou ao Concello de Moraña a organizar esta festa gastronómica declarada de interese turístico de Galicia.
Na carballeira de Santa Lucía ásanse os carneiros durante máis de oito horas, colocados en círculos ao redor de brasas obtidas da madeira nobre de carballo. Para degustar o exquisito resultado desta laboriosa preparación é necesario reservar por lotes de vinte persoas, que sentarán a comer nas mesas e bancos distribuídos pola zona o produto estrela xunto a empanada, viño, pan e café. Pero aquelas e aqueles que non logren reunir ese número de comensais poden tamén gozar deste magnífico produto nos restaurantes da localidade.
