Rías Baixas, líder en sendeiros azuis en España
Xunto coa publicación das bandeiras azuis que lucirán as praias en 2018, a asociación ADEAC (Asociación de Educación Ambiental e do Consumidor) tamén deu a coñecer os resultados dos denominados sendeiros azuis.
Como resultado, a provincia de Pontevedra lidera o ranking cun total de 12 certificados, á que lle segue A Coruña con 8. Lugo, con 4 sendeiros, pecha a lista galega, que se sitúa novamente na cabeza deste ranking a nivel nacional cun total de 24 sendeiros.
Dentro da provincia pontevedresa, do mesmo xeito que coas bandeiras azuis, Sanxenxo volve ser o municipio con máis tramos grazas á súa rede de sendeiros, que ata o ano pasado eran valorados individualmente e agora están unidos baixo una mesma rede azul que engloba 6 tramos. Séguelle Vigo con 3 sendeiros. Pola súa banda, os de Nigrán e Baiona, ao estar pegados, dan lugar a un paseo longo e belo por toda a súa costa.
Rede de Sendeiros Azuis de Sanxenxo: sendeiro máxico da Lanzada, tramo Magor-Montalvo, tramo Montalvo-Paxariñas, tramo Canelas-Punta Cabicastro, tramo Sanxenxo-Portonovo e tramo Areas-Punta Festiñazo. Este último tramo é a única novidade na provincia.
Vigo: senda entre faros das illas Cíes, senda litoral do monte da Guía e senda de ribeira e litoral: camiño á Beiramar.
A Guarda: senda litoral da Guarda.
A Illa de Arousa : senda perimetral Bao-Xastelas.
Baiona: sendeiro litoral de Baiona.
Bueu: sendeiro de cabo Udra.
Cangas: sendeiro de Donón.
Marín: ruta das praias e os cinco miradoiros de Marín.
Nigrán: sendeiro litoral do ecosistema dunar de Praia América-Panxón.
Hoxe forman parte da rede 45 países de cinco continentes
Para que se outorguen estes certificados, tanto as bandeiras como os sendeiros azuis, deben solicitalos os propios concellos. O requisito no caso destes itinerarios é que conecten diferentes praias ou portos galardoados coa bandeira azul, ademais de que se busque a protección do medio natural, existan infraestruturas a disposición dos usuarios e conten con información e interpretación do seu valor ambiental.
Ademais de Galicia, o resto de comunidades con sendeiros galardoados son a Comunidade Valenciana, que tamén obtivo o maior número de bandeiras azuis, con 21; Andalucía, con 11; Cataluña, con 7; Asturias, Illas Baleares e Canarias, con 3; Cantabria e Murcia, con 2, e unha para Estremadura, cuxo sendeiro azul de Costa Doce, en Orellana la Vieja, é o primeiro por unha senda fluvial.
A ONG ADEAC xestiona en España os sendeiros azuis e as bandeiras azuis co apoio da Fundación Biodiversidade, do Ministerio de Agricultura, Alimentación e Medio Ambiente. A orixe da bandeira azul sitúase en Francia no ano 1985. Xa desde 1987 foron uníndose máis países, como España, e comezou a coordinalas a FEEE (Foundation for Environmental Education in Europe). Hoxe forman parte da rede 45 países de cinco continentes.
