RíasBaixasFests, os festivais Rías Baixas para 2018
Para quen non queira esperar ao último momento para organizar as súas vacacións de verán, deixamos a continuación as datas dos festivais de música máis importantes de Pontevedra:
PortAmérica
O primeiro deles será PortAmérica, que, aínda que comezou en Nigrán, agora se celebra no municipio de Caldas de Reis, con grande éxito na súa edición de 2017. En 2018 será os días 5, 6 e 7 de xullo, e o abono para o tres días custa 40 €.
Entre as curiosidades, destaca a súa iniciativa ecolóxica de plantar unha árbore por cada entrada. E para quen, ademais de escoitar música, desexe realizar algo de turismo, deixamos algunhas suxestións.
Vive Nigrán
O segundo en montar o escenario será Vive Nigrán, que en 2018 desenvolve a súa segunda edición. Aposta por grupos novos e un público diverso que xa amenizou a súa primeira edición xunto ás praias do municipio de Nigrán. Este ano celebrarase o 20 e 21 de xullo e o abono para as primeiras 100 persoas custa soamente 18 €.
Páxina oficial, Facebook, Twitter
Atlantic Fest
Se Vive Nigrán se desenvolve na fachada sur, o Atlantic Fest lévanos máis ao norte, á Illa de Arousa, concretamente a mesma fin de semana pero cun día máis de festa: os días 20, 21 e 22 de xullo. En 2017 foi o encargado de abrir a tempada festivaleira nun espazo envexable da ría de Arousa.
O abono parte dos 45 €. Ademais das actividades que ofrece, se desexas facer turismo deixamos unha miniguía.
Páxina oficial, Facebook, Twitter
Sinsal Son Estrella Galicia
Trátase dun dos festivais máis exclusivos que podemos atopar, xa que se celebra na pequena illa de San Simón, Redondela. Ademais, conta coa particularidade de que o cartel non se coñece ata que as e os artistas soben ao escenario. En 2017 trouxo músicos dos cinco continentes, e en 2018 resérvanse catro días de celebración, desde o 26 ao 29 de xullo. O abono sairá en abril, e coñecer algúns dos seus encantos máis turísticos é case unha obriga.
Páxina oficial, Facebook, Twitter
Sinsal Son Estrella Galicia é un dos festivais máis exclusivos que podemos atopar, xa que se celebra na pequena illa de San Simón
SonRías Baixas
Unha vez finalizado o mes de xullo, SonRías Baixas recíbenos en Bueu o 2, 3 e 4 de agosto despois dunha fantástica edición en 2017. O abono pódese obter a partir de 20 €. En canto ao turismo, achegarse a este festival é unha excelente ocasión para coñecer a fermosa costa do Morrazo.
Páxina oficial, Facebook, Twitter
Revenidas
Dúas semanas despois será a quenda de Revenidas en Vilaxoán (Vilagarcía de Arousa), que en 2017 atraeu ata 26 grupos e obtivo récord de asistencia. As datas en 2018 para o seu XV aniversario serán os días 17, 18 e 19 de agosto.
Miniguía para coñecer os arredores de Vilagarcía de Arousa.
Páxina oficial, Facebook, Twitter
6 festivais aos que se sumará O Marisquiño de Vigo. Aínda que non ten data pechada, adoita realizarse no mes de agosto e, ademais de concertos, está centrado no deporte urbano.
