Santa Compaña, festivais de terror, magostos… así é o "Halloween" ao estilo Rías Baixas
A Santa Compaña sairá en procesión polo Berbés (Vigo) e outros lugares da provincia; os mortos viventes, bruxas e pantasmas desfilarán en Catoira; Cambados celebra un festival do terror... As cabazas talladas locen por toda a provincia nas Rías Baixas, inmersas na festa de Halloween, que en Galicia ten o selo autóctono do Samaín, de tradición celta compartida con outros territorios como Bretaña, Irlanda ou Gales.
Sabucedo viviu o fin de semana a Musa, un Samaín tradicional con magosto, muiñada e diversas actividades. E noutros moitos municipios xa desde o venres deuse o pistoletazo á festa pagá de raíces galegas e ao seu equivalente norteamericano, cada vez máis estendido por todo o mundo. Aquí suxerímosvos algunhas citas para estas terroríficas horas previas ao Día de Todos os Santos.
Vigo. Numerosas festas de Halloween celébranse no centro e nas parroquias. Destacamos a do Berbés, o barrio mariñeiro da cidade, onde terá lugar este martes o Samaín. Ás 17.00 horas arrincan as actividades na praza do Berbés cun taller de maquillaxe e calacús (as cabazas baleiradas e caracterizadas con malvados rostros). Ás seis actúa Fantoche Baj, ás sete empeza o magosto a prezos populares, e ás oito sae a Santa Compaña, á que pode unirse quen queira vestido coas roupaxes destas ánimas e aparecidos. A Foliada de Defuntos culmina os actos.
Preto de alí, na zona do Náutico, tamén haberá festa con terroríficos pasacalles entre as sete da tarde e as nove. Vós decidides: truco, ou trato.
Pontevedra. Bruxas, pantasmas e mortos viventes campan ás súas anchas pola cidade, con diversos puntos de encontro. Nós queremos pararnos no Museo de Pontevedra e suxerimos unha actividade para público infantil. O contacontos Cando as meigas do Museo coñeceron á gata Ágata, destinado a público infantil a partir de cinco anos e as súas familias, dará comezo ás seis da tarde no Sexto Edificio e non necesita inscrición previa.
Cambados. O Parque do Torrado acolle este martes a celebración do Halloween da Cidade Europea do Viño 2017. Click Clack presentará Contos da Lúa Chea e ao termo repartiranse doces típicos elaborados pola Asociación de Amas de Casa de Cambados. Un Festival de Terror sementará o pánico no Instituto Asorey.
Catoira. Coidado: ás sete da tarde desfilarán pola localidade mortos viventes, bruxas e pantasmas.
Redondela. Suxerímosvos unha actividade para o fin de semana. A Asociación Deportiva e Cultural de Rande celebra o sábado no Museo de Meirande a tradicional festa do Samaín e un magosto popular. As actividades darán comezo ás cinco e media da tarde.
Feliz e terrorífico Halloween e Samaín.
