SonRías Baixas incorpora ao cartel á mítica banda arxentina Todos tus muertos, Narco e o cantante de El Puchero del Hortelano
Os grandes festivais de verán nas Rías Baixas seguen sumando artistas. SonRías Baixas, que se celebra en Bueu os días 3, 4 e 5 de agosto, anunciou a incorporación ao seu cartel da banda arxentina Todos tus Muertos, un referente no rock latinoamericano desde mediados dos anos 80. A organización confirmou esta mañá a "fichaxe", ao que se unen outros dous: os sevillanos Narco e o cantante de El Puchero del Hortelano, ARCO. Anteriormente adiantara que Amparanoia e SES actuarán no evento da localidade do Morrazo, un dos sete que forman o circuíto de festivais das Rías Baixas -apoiados todos eles pola Deputación de Pontevedra- xunto con O‘ Marisquiño, Portamérica, Atlantic Fest, Cultura Quente, Revenidas e Sinsal. Ademais, haberá outras sorpresas no festival buenense, xa que aínda quedan nomes por revelar .
Tres dos membros de Todos tus Muertos –o cuarto, Horacio Villafañe, faleceu en 2011- actúan por primeira vez en España dezaseis anos despois de separarse. O concerto de Bueu será a única oportunidade en Galicia de gozar do reencontro da banda de rock, punk e reggae. O andaluces Narco, pola súa banda, exhibirán no SonRías 2017 a enerxía do seu metal, rock e rap, mentres que ARCO, coa súa voz rota e a instrumentación clásica de banda de rock e coidadas letras, presentará o seu proxecto persoal, a medio camiño entre Sabina e Extremoduro, tras o seu fin de ciclo en El Puchero del Hortelano. As entradas para os tres días de concertos custan 27,5 euros máis gastos e inclúen acampada. O prezo é especial e limitado, e os billetes xa están dispoñibles na web sonriasbaixas.info.
A pasada edición acudiron ao festival 16.500 persoas, segundo os datos da organización, o que supuxo unha inxección económica de 1,2 millóns de euros para Bueu. Máis de 300 persoas participan nos preparativos e desenvolvemento do evento musical.
Atlantic Fest
Outra das grandes citas do verán, o Atlantic Fest, que se celebra na Illa de Arousa os días 30 de xuño e 1 e 2 de xullo, sumou tamén máis nomes ao seu atractivo cartel. Confirmados anteriormente Los Planetas e The Temper Trap, agora a organización engade Rosalía & Raül Refree, Joe Crepúsculo e Os Amigos dos Músicos. As entradas están á venda en www.atlanticfest.com.
