Surfeando o aire nas Rías Baixas
Non é necesario esperar a que salga o sol estival para poder gozar do mar e a praia. Ben o saben as e os deportistas que se achegan ás nosas beiras en todos os meses do ano. Uns a través do mergullo e outros co remo ou a vela por mencionar algún. Cuantiosas son as alternativas deportivas desenvolvidas no mar e hoxe detémonos nun destes deportes para toda e todo aquel que desexe achegarse ás nosas costas ou a comezar un novo deporte. Falamos do kitesurf.
O Kitesurf leva existindo unhas décadas como deporte oficial, aínda que non foi ata anos recentes cando máis se popularizou no noso país. Exemplo diso é a praia de Cesantes, onde se antes se vían windsurfistas, agora é bastante máis común apreciar aos kitesurfistas lidar co vento.
Unha actividade que para nada se incluiría entre os deportes perigosos segundo os seus seguidores, pero que non quita que se desaconselle sempre o auto-aprendizaxe polos riscos que podería con levar tanto para unha ou un mesmo como para terceiras persoas. Por ao redor de 250 euros máis dun centro ofrece ensinarche en tan só 9 horas e en tres ou catro xornadas todo o necesario para ser independente neste deporte.
Unha vez dominada a cometa e a táboa, entre as praias para gozar do kitesurf na provincia, destacamos a praia da Concha e Bamio en Vilagarcía de Arousa, A Lanzada, sempre mencionada, tanto pola súa beleza como polas súas posibilidades deportivas. E no mesmo municipio do Grove, a da Mexilloeira.
A Lanzada é unha das praias máis populares mesmo a nivel nacional, ademais de kitesurf , tamén se pode practicar windsurf e surf
Na ría de Pontevedra atopamos a praia de Lourido no municipio da capital da provincia, e na ría de Vigo, a de Cesantes en Redondela e a Liméns en Cangas. Máis ao sur, na Guarda, destaca a de Armona no estuario do Miño facendo fronteira con Portugal.
Praias para facer kitesurf que comparten terreo pola súa orografía e a converxencia do vento con outras actividades como o windsurf, como é o caso das praias antes mencionadas de Cesantes ou A Lanzada.
Anteriormente falaramos deste tipo de actividades nas Rías Baixas, e tamén indicado cinco bos enclaves en Pontevedra para practicar surf neste artigo. Lembrándoos rapidamente, falabamos das praias da Lanzada no Grove e Sanxenxo, a de Montalvo tamén en Sanxenxo, e a área intermareal Umia-O Grove. Na ría de Vigo destaca a de Patos, no concello de Nigrán . Ademais, entre os nosos recursos, se tecleas "surf" no mapa, poderás acceder a algúns dos centros que ofrecen cursos para aqueles e aquelas que lles interese iniciarse.
