O Morrazo abre dúas rutas de tapeo con máis de 40 establecementos participantes
Paisaxes. Praias. Patrimonio artístico ou histórico. As razóns para visitar O Morrazo, na provincia de Pontevedra, son numerosas durante todo o ano. E en momentos como este mes de febreiro multiplícanse, pois esta comarca das Rías Baixas ten por diante numerosas xornadas de exaltación gastronómica. En concreto, máis de 40 bares e restaurantes participan en rutas de tapeo nas que se ofrecerán grandes bocados en pequenos petiscos.
Estas tapas enmárcanse en dúas actividades diferentes. A primeira delas, a III Feira da Tapa de Inverno, ten lugar no municipio de Cangas. Trátase dun certame impulsado pola Asociación de Restauradores de Cangas (Arenca) que poderá gozarse ata o día 12 deste mes. Un total de 22 establecementos danse cita neste itinerario culinario, cuxas propostas teñen un custo de 2 euros.
Pero o cangués non é o único municipio en que febreiro se presenta con moito sabor. En Bueu, un itinerario de tapas e cócteles organizado por restauradores e administración municipal propón un percorrido por unha vintena de establecementos que ofrece unha razón máis para achegarse á localidade entre o 16 e o 19 de febreiro.
Así, entre as propostas gastronómicas de ambas as rutas, o comensal poderá gozar de Cangas e Bueu mentres saborea salmón, pizza, mariscos, grelos, lacón, carnes ibéricas, peixes, froitos secos ou queixos, entre múltiples ingredientes e receitas.
