Tres DepoRutas para estirar as pernas na "mountain bike"
O deporte e o turismo sustentable son dous das grandes apostas da Deputación de Pontevedra e Turismo Rías Baixas un ano máis. As DepoRutas BTT, que permiten coñecer o medio natural en "mountain bike", regresan esta tempada e a oferta pasa de dúas a tres: o 17 de xuño en Sabucedo (A Estrada), o 2 de setembro entre Caldas de Reis, Portas e Barro; e o 30 do mesmo mes nos montes de Vigo.
Para cada DepoRuta hai dispoñibles 300 prazas gratuítas, a idade mínima de inscrición é de 14 anos e o prazo abrirase o 14 de maio. A presidenta da Deputación, Carmela Silva, presentou esta mañá a iniciativa xunto a alcaldes e comunidades de montes dos municipios que atravesarán as e os participantes. "Apostamos polo deporte, a saúde e un modelo de turismo sustentable", apuntou Silva, e lembrou que o ano pasado esgotáronse as prazas en 24 horas.
En Sabucedo pasa polos montes onde pacen os cabalos salvaxes, e en setembro retómase o programa cunha saída Caldas de Reis-Portas-Barro, e outra por Vigo
O alcalde de Caldas de Reis, Juan Manuel Rey, destaca que as DepoRutas BTT "permiten poñer en valor todo o noso patrimonio natural e histórico", mentres que o primeiro edil de Barro, José Manuel Abraldes, resalta que o deporte é unha boa forma de descubrir o municipio. O tenente de alcalde de Vigo e deputado David Regades explica pola súa banda que as rutas "incentivan o deporte e o respecto ao monte, que é bo encher de contido despois da vaga de incendios do pasado outubro".
Apoio á Epic Race
O acto incluíu tamén a promoción da Epic Race Pontevedra, que apoia a Deputación de Pontevedra. A proba terá lugar os días 6, 7 e 8 de abril, consta de 550 quilómetros divididos en oito etapas, e por primeira vez toca Portugal, en concreto Valença do Minho. As e os participantes poden facer o percorrido en solitario, e en equipos de dous, tres ou catro; e a proba non se detén. Existe unha opción menos esixente, a Half Epic Race, coa metade de itinerario. "É unha competición que ofrece paixón, diversión, emoción e sufrimento", replicou o director da organización, Víctor Cimadevila.
Contámosvos máis aquí sobre as tres DepoRutas BTT:
Sabucedo (17 de xuño)
Dificultade: media
Percorrido: circular
Punto de saída: curro de Sabucedo.
A ruta arrinca nun marco espectacular, o curro de Rapa das Bestas. Discorre pola zona norte de Sabucedo alternando treitos de dificultade baixa con outros máis técnicos de subida e baixada. A partir do segundo terzo enlazaranse diferentes núcleos da Estrada (Vilanova, Portela, O Coto, Xubrei, Codeseda…), gozando as e os participantes ao seu paso de elementos de enorme valor cultural.
Caldas de Reis-Portas-Barro (2 de setembro)
Dificultade: media
Distancia: 25 quilómetros
Percorrido: circular
Punto de saída: carballeira de Caldas
Desde a céntrica carballeira a ruta segue cara á contorna da fervenza de Segade. A partir de aí toma dirección sur ata o parque da natureza do río Barosa, achegándose despois a Barro. Finalmente regresará ao momento de inicio.
Vigo (30 de setembro)
Dificultade: alta
Distancia: 40 quilómetros
Percorrido: circular
Saída: parque forestal do Vixiador (Candeán)
A ruta discorre pola parroquia viguesa de Candeán, pasando por outras como Cabral, Lavadores ou Teis. Segue parte do percorrido da ruta da Auga, que ofrece unhas magníficas vistas sobre a ría de Vigo, Rande e San Simón.
