Tui estrea paseos en barco polo río Miño
Percorrer o río Miño a bordo dunha embarcación será posible axiña en Tui. O municipio estreará en abril estes paseos, que ata outubro permitirán aproximarse á historia da localidade desde o leito fluvial. Trátase dunha das novidades turísticas da oferta tudense, que se deu a coñecer da man dun novo folleto de promoción da oferta que Tui realiza ao visitante.
En concreto, estes paseos en barco poderán levarse a cabo todos os días ata o mes de outubro e en dúas franxas horarias, ás 11 e ás 19 horas. Dunha hora de duración, estes novos percorridos seguen o ronsel dos que se veñen organizando en diversas localidades de Portugal.
Con respecto ao seu novo folleto turístico, cunha tiraxe de 20.000 exemplares, esta guía reúne os atractivos hostaleiros, de lecer e patrimoniais do municipio. Editados en castelán, inglés e portugués así como, seguidamente, en galego, francés e alemán, estes documentos atópanse xa á disposición do público tanto na Oficina Municipal de Turismo como en diversos establecementos tudenses.
Neste compendio destacan propostas como o conxunto histórico, o Parque Natural Monte Aloia, o tren turístico da Eurocidade Tui-Valença ou a catedral, entre os numerosos atractivos cos que conta a localidade. Igualmente, na súa oferta turística Tui aposta decididamente polo Camiño Portugués, do que o municipio é punto de inicio en Galicia. Del partiron no último ano un total de 15.159 peregrinos, o que supón 1.360 máis que en 2015. Neste sentido, o alcalde de Tui e o de Oroso intercambiaron recentemente experiencias sobre o paso das rutas xacobeas por ambos os territorios.
Máis de 50.000 visitantes nun ano
Por outra banda, cabe sinalar que no último exercicio un total de 54.466 persoas solicitaron información turística na Oficina Municipal de Turismo de Tui e o Punto de Información Turística, dato que supuxo un crecemento do 100 % con respecto ao 2015.
