Tui inaugura con Mago de Oz dez días de festa na honra a San Telmo
Tui inaugura este sábado as festas na honra a San Telmo, uns festexos que durarán dez días (ata o día 24) e que abrirá a actuación de Mago de Oz. Estas celebracións xirarán ao redor da promoción do Camiño de Santiago que, na súa variante portuguesa, ten en Tui a porta de entrada a Galicia desde terras lusas. Deste xeito, realizarase un especial recoñecemento a Víctor Manuel Vázquez Portomeñe polo seu papel fundamental na revitalización deste itinerario, outorgándolle a medalla de honra da cidade.
No seu inicio Mago de Oz deleitará aos asistentes nun concerto gratuíto que terá lugar na rúa Compostela. Cabe sinalar que a banda de folk metal creada en 1988 conta cunha longa traxectoria musical sempre liderada por Txus di Fellatio. Cun estilo propio e orixinal, destacan os seus directos con grandes doses de rock, heavy metal e música celta.
Con posterioridade, durante cada xornada a animación musical chegará da man de recoñecidas orquestras e grupos musicais entre os que se atopan Passarela, América, Abanico, Capitol, Olympus, Fillos do Estramonio, Batemento, Pelepau ou 6TAs9. Actividades infantís e proxeccións de cinema completan a programación destes eventos, declarados de interese turístico galego.
No campo deportivo, terán lugar actividades xa consolidadas como a Carreira Solidaria de San Telmo xunto á Andaina de San Telmo, unha concentración de coches clásicos, un curso de marcha nórdica, o II Torneo Cidade de Tui de Fútbol sala e a Copa San Telmo Eurocidade de Fútbol. Así mesmo, a Feira Cabalar, que se celebra o luns de San Telmo (24 de abril) desenvolverase ao longo de toda a xornada con distintas actividades e exhibicións.
Teatro e folclore
Ademais das citadas actividades, nas festas de San Telmo enmárcanse outras como un Festival Folclórico –o domingo– ou a novena edición da Semana do Teatro Afeccionado, que ten lugar do día 17 ao 22.
