Noticia - Últimos días para visitar os Beléns máis rechamantes da provincia - Detalle noticia - Turismo Rias Baixas

Aínda estamos a tempo de visitar algúns dos Beléns máis singulares de Rías Baixas, un plan que gustará especialmente aos nenos e nenas nesta última semana de vacacións do Nadal que se presenta pasada por auga. Estas son algunhas das propostas máis destacadas:

• Cangas: no barrio de Berbetaña atópase a casa de Francisco Martínez Prieto, que herdou do seu pai a tradición de crear cada ano un gran Belén artesanal, con escenas en movemento e diferentes automatismos. Aberto ao público ata o 7 de xaneiro.


• Mondariz Balneario: primeiro Manuel Pérez e agora a súa filla Paula expoñen ao público o seu Belén familiar, no que atopamos figuras en movemento e sons, entre outros efectos. Aberto entre semana na Avenida Enrique Peinador, nº5, ata o 7 de xaneiro e os fins de semana, ata o 4 de febreiro.


• Mos: dúas son as propostas que nos levan a esta localidade, unha delas consolidada e a outra do trinque. O Belén de Herville cumpre once anos con fama de ser un dos máis bonitos da provincia, pola súa coidadosa posta en escena. Está aberto ata o 14 de xaneiro, na sede que a Asociación Cultural Herville ten na parroquia de Cela. E no pazo de Mos inaugurouse este ano por primeira vez unha montaxe solidaria a iniciativa dun colectivo veciñal.


• Ribadumia: outra representación destacada que parte da iniciativa privada, esta vez, do veciño Francisco Martínez Oliveira. Trátase dun Belén monumental con figuras en movemento, distribuídas en 20 metros cadrados.


• Tui: a capela das Reliquias da Catedral de Tui alberga a colección "Beléns do mundo", que inclúe 300 nacementos procedentes de diversos países, nos que podemos atopar desde koalas a iglús. Ademais, a catedral tamén conta cun Belén tradicional. Ambas as exposicións están abertas ata o fin de semana de Reis.


• Valga: a localidade a beiras do río Ulla presume de exhibir o maior nacemento artesanal de Galicia con figuras en movemento. O seu tamaño e as súas escenas animadas non son a súa única particularidade, xa que se trata dunha composición que combina os personaxes tradicionais do belén con figuras da actualidade. É o único Belén declarado de interese turístico da provincia de Pontevedra e está aberto ata o 14 de xaneiro.


• Vigo: na cidade olívica temos unha variada oferta de representacións do Nadal. Na Casa das Artes atópase o espectacular Belén monumental organizado polo concello, pódese visitar ata o 7 de xaneiro. Ademais, o Teatro Afundación expón ata o 6 de xaneiro os orixinais Beléns que se presentaron ao seu concurso, que este ano alcanzou a súa 52 edición. Tamén resulta curioso o Belén de Playmobil do Centro Comercial Praza Elíptica, que se exhibe ata o 12 de xaneiro.