Un exquisito menú a base de camelia no Carlos Oroza
A camelia é fermosa,… e tamén saborosa. O CIFP Carlos Oroza explora a fondo desde hai dous anos o potencial gastronómico desta flor chegada de Oriente pero que xa é característica das Rías Baixas. Pastas de té elaboradas con camelia Chojiguruma e Narumigata e nubes da variedade Dazzler son algunhas das deliciosas elaboracións que saíron deste proxecto pioneiro, no que, baixo a coordinación das profesoras Tina Otero e Pilar Tallón, tamén participan o CIFP A Granxa de Ponteareas e o IES Montecelo.
Dentro desta iniciativa o equipo do Carlos Oroza preparou onte un delicioso menú, coa participación especial do chef Iñaki Bretal, para un centenar de persoas convidadas, entre as que se atopaban a presidenta da Deputación de Pontevedra, Carmela Silva; o deputado Santos Héctor Rodríguez e a deputada Eva Vilaverde.
Pescada en papillote, trío de afumados e foie aromatizado con pétalos foron algunhas das delicias preparadas polo alumnado
Baixo o suxestivo título que da nome ao proxecto, "A nosa camelia, tan curiosa como saborosa", o menú que despregou o alumnado ofrecía manxares como un trío de afumados (bacallau, xarda e salmón) con rama de camelia, foie aromatizado con pétalos High Fragrance, pescada en papillote con fragrancia de Dazzler, sorbete de vermú de camelia, e lingote de tenreira galega con escamas de sal Chokiguruma. Para coroar estas delicias o equipo preparou unha Bavaroise de chocolate, cítricos e camelia rosada, e xeado de nata con faíscas de camelia Fragant Pink. O salón estaba decorado para a ocasión coa camelia como motivo central.
En Fitur 2018, que tivo lugar en xaneiro, a Deputación de Pontevedra incluíu o proxecto da camelia dos tres centros mediante a distribución dunha caixa-regalo que contiña produtos elaborados polo alumnado con camelia.
