Vigo promóvese en Inglaterra como sede do campionato J70 de vela en 2018
A organización do campionato J70 de vela iniciou en Inglaterra a promoción de Vigo como sede desta proba europea. A través dunha peza audiovisual, o colectivo resume as principais características que converten á cidade olívica en firme candidata para ser escenario destas regatas.
Así, a costa galega e, en concreto, a das Rías Baixas é o punto forte da promoción. Neste sentido, J70 fai fincapé tanto nas características das rías galegas –propias da comunidade– como das aplaudidas praias da provincia pontevedresa, destacando o feito de que areais das Illas Cíes fosen catalogados como os mellores do mundo por algúns medios. Así mesmo, as propias illas forman parte dos argumentos do colectivo deportivo, que destaca a totalidade do Parque Nacional das Illas Atlánticas de Galicia.
Pero xunto aos recursos costeiros, J70 sinala as instalacións e capacidade de Vigo para a loxística do evento. Así, sobresae o Real Club Náutico, as decenas de prazas de aloxamento e atención ao visitante que ofrece a cidade ou o aeroporto de Peinador.
Gastronomía e infraestruturas
Finalmente, a organización deste campionato ofrece outras razóns que distinguen a Vigo e As Rías Baixas. É o caso da cociña galega, cos considerados como mellores mariscos e peixes do mundo, ou as súas infraestruturas. Neste último caso, coa ponte de Rande como un dos emblemas da capital viguesa.
