Visita hollywoodense aos miradoiros de Moaña
Josch Hutcherson, o novo actor de 24 anos que representou o papel de Peeta Melllark na serie de películas de Juegos del hambre déixase ver polas Rías Baixas segundo informaron medios locais. As fotografías corresponden a uns selfies feitos na costa da ría de Vigo desde o municipio de Moaña xunto con Óscar Franco, que desenvolve traballos para varias das series que se están rodando en Galicia, como Vivir sin permiso e Fariña.
Despois de pasar uns días polas Rías Baixas, entre Vilagarcía de Arousa, Moaña e Aldán, o actor continuaba unha ruta polo Cantábrico coa súa parella, segundo informou o propio Óscar Franco. O mesmo especialista engade que expresou a súa fascinación polas vistas desde estes puntos da ría.
Os miradoiros de Moaña.
Josch Hutcherson non é o primeiro nin será o último ao que lle encantan as vistas desta parte da ría. Unha zona que podería pasar desapercibida para moitas persoas no seu paso cara a outros destinos como o final da costa, en Cabo Home, ou as distintas praias de Cangas e Bueu.
Achegarse a zonas novas menos comúns nas guías turísticas fai que sexa todo un pracer descubrilas
Quizais por iso mesmo, achegarse a zonas novas menos comúns nas guías turísticas, sexa todo un pracer descubrilas. Entre estas zonas destacadas atópase o miradoiro da Fraga, entre Moaña e Marín. Desde ese punto pódese divisar tanto a cidade de Moaña ata a cidade de Vigo.
Preto, no monte Domaio, localízase tamén o miradoiro de monte Faro, a 622 metros sobre o nivel do mar, e que se pode apreciar desde calquera outro punto da ría porque é onde están situados os postes de retransmisión de telecomunicacións. Desde o mesmo pódese ver a ponte de Rande e a enseada de San Simón.
Outra opción é achegarse a reliquias arqueolóxicas con 5.000 anos de historia como o Dolmen de Chan de Arquiña, ou gozar da fervenza da Moura, neste caso, un pouco máis difícil de localizar, pero cuxo paseo e poza merecen a pena.
Saíndo de Moaña podemos ir cara a Cangas, onde o número de miradoiros aumentaría, en moitos casos ligados a paseos polo monte que gozan dunhas vistas envexables durante todo o traxecto. Máis preto atopariamos tamén o parque de Cotorredondo para dar un paseo.
Fotografía de Slackerwood cedida vía CC
