Visitas guiadas ás medianeiras de Vigo
Desde hai anos, a urbe galega de Vigo viuse envolta nun proceso embelecedor sen igual. Entre os traballos que se levaron a cabo, destacan pola súa popularidade os singulares murais ou medianeiras que cobren grandes edificios de diversas áreas da cidade. A súa calidade estética e extensión fai que resulte difícil que pasen desapercibidas para o público.
Difícil é que pase unha tempada sen que se inaugure un mural novo. Un proceso de museización no que a proxección das e os artistas termina contrastando co legado industrial e costeiro da vila. Na actualidade existen máis de corenta e espérase que para fin de ano aumenten ata 60.
Agora, recentemente iniciado 2018 e do mesmo xeito que fixese en 2017, o Concello de Vigo programou visitas guiadas para coñecer a historia que hai detrás de cada un destes murais. En total, cinco rutas para coñecer as novas proxeccións desde o 3 de febreiro ata finais de marzo.
A duración das mesmas será de 90 minutos e están programadas ás 11 da mañá diversos sábados e mércores de febreiro e marzo. Ademais da realizada o 3 de febreiro desde a praza Peniche, as seguintes sesións serán os días:
Mércores 7 de febreiro. Discorrerá desde o Parque Infantil "Charly Rivel" no Castro ata praza de España.
Mércores 21 de febreiro. A terceira ruta dirixirase a Beiramar, desde rúa Ánimas ata a Pérgola de Jenaro de la Fuente.
Sábado 3 de marzo. A cuarta levaranos ao centro da cidade. Partindo de Santiago de Vigo para pasear posteriormente polos espazos de Serafín Avedaño, Rosalía de Castro e Areal principalmente.
Mércores 7 de marzo . A quinta ruta planificada centrarase nas medianeiras expostas na zona de Travesas, pasando polos novos murais de Pintor Colmeiro, praza Independencia, Camelias, López Mora, praza América, Coruña, avenida de Castelao, pavillón de Travesas e avenida de Castrelos .
O sábado 17 de marzo repetirase a primeira das rutas do día 3 de febreiro (desde Peniche ao Berbés). Mentres que o mércores 21 repetirase a ruta número 5, de Travesas.
Outras Visitas
Ademais destas rutas creadas para esta ocasión, existen outras opcións de carácter permanente. Son as visitas guiadas ao Vigo Pesqueiro. Unha inmersión nun dos portos pesqueiros máis importantes a nivel internacional, onde traballan ata 6.000 persoas de maneira directa segundo datos do propio concello.
O traballo realízase cando a cidade dorme, polo que unha das visitas, de dúas horas de duración, é ben cedo. Ás 7 da mañá. A seguinte sería ás 11 da mañá.
Ademais desta opción ligada ao Turismo Mariñeiro, existen outras rutas, como as guías preparadas para que as e os turistas realicen os seus percorridos de maneira individual cando o desexen.
