XVIII Feira de Nadal do Galo de Curral de Vila de Cruces
Chega a XVIII Feira de Nadal de Vila de Cruces e con ela o seu "Galo de Curral". A feira gastronómica terá lugar o venres 22 de decembro coincidindo co popular sorteo de Lotería de Nadal.
O evento ofrece unha das mellores opcións para abastecerse cos mellores galos para preparar exquisitos guisos nos seguintes días do Nadal. Lonxe de ser un mercado máis, a feira destaca pola calidade dos produtos autóctonos, onde ata fai ben pouco todos os animais eran criados no campo, especialmente os galos, e cuxo resultado son ben reflectidos posteriormente no prato.
A apertura da feira realizarase ás 11 da mañá na praza de abastos onde na tempada actual, a organización busca aumentar as vendas do ano pasado, cando as vendas roldaron as 300 pezas.
A feira destaca pola calidade dos produtos autóctonos, onde ata fai ben pouco todos os animais eran criados no campo e cuxo resultado son ben reflectidos posteriormente no prato
Ademais, contará cunha sesión infantil chamada "Galo Chef infantil" para menores de 6 a 12 anos ata esgotar as prazas, limitadas a 25 persoas. A partir das 12 haberá unha degustación ofrecida por varios restaurantes de varios municipios.
Trátase dunha feira que busca selar o seu produto coa certificación da Xunta Indicación Xeográfica Protexida (IXP). Segue desta maneira un ronsel similar á da Festa do Galo de Curral do mesmo municipio que tivo lugar na primavera. Nese caso, con XXIV edicións ás súas costas, é unha das festas gastronómicas máis lonxevas e populares que ademais ostenta o distintivo de Festa de Interese Turístico de Galicia.
Que visitar
O municipio da comarca de Deza ofrece moitas opcións especialmente para todas aquelas persoas que desexen facer turismo rural grazas a unha paisaxe excepcional. Falamos de espazos naturais protexidos como os "Sobreirais do Arnego" que comparte xunto con outros concellos. En canto ao cultural, destaca o mosteiro San Salvador de Camanzo, o Observatorio Astronómico, único observatorio en Galicia ata 2009, ou a Fundación Neira Vilas de carácter etnográfico. E do mesmo xeito que no resto da provincia, pódense localizar vilas castrexas para todas e todos as amantes da arqueoloxía.
