O Miúdo Fest de Mos convida a bailar aos e ás pequechas da casa
O Festival Miúdo Fest de Mos chega á súa segunda edición cunha proposta de catro actuacións musicais nas que se inclúen algúns dos espectáculos de máis éxito do panorama cultural galego no ámbito infantil. Trátase de "Brinca Vai", de Paco Nogueiras, que ofrece cancións para os doce meses do ano, con estilos musicais variados que van do techno ao rock; e a proposta lúdico musical "Uxía Lambona e a Banda Molona", liderada por Uxía Senlle, que traslada ás máis pequenas e pequenos temas tradicionais galegos dunha forma nova e atractiva.
O cartel complétase cos concertos de Pakolas , o espectáculo de pequeno formato de Paco Cerdeira; e de Cé Orquestra Pantasma, do "home-orquestra" César Freiría. As actuacións darán comezo o sábado 16 de setembro, a partir das 16:30 horas da tarde, no Centro Cultural As Pedriñas, de Tameiga. A entrada custa 3 euros.
As persoas interesadas en festivais dirixidos ao público infantil teñen outra cita a finais de mes en Pontevedra, co Festival das Núbebes.
