Coñece os espazos Rede Natura 2000 de Rías Baixas
A Rede Natura é un proxecto da Unión Europea cuxo obxectivo é a conservación da biodiversidade e hábitats esenciais para as especies autóctonas europeas máis sensibles.
Entre as distincións existentes da Rede, a que nos outorga maior atención son as Zonas de Especial Conservación (ZEC), que coinciden á vez coa denominación autonómica que lles outorgou a Xunta, Zonas de Especial Protección dos Valores Naturais (ZEPVN).
Ademais, algunhas foron catalogadas tamén como Zonas de Especial Protección de Aves (ZEPA), é o caso do Parque Nacional das Illas Atlánticas, o Estuario do Miño e o Complexo Intermareal Umia-O Grove e que ben foron recollidos no especial de ornitoloxía. Xunto a estes tres, a provincia conta con outros 15 espazos de Rede Natura:
Zonas de especial protección na costa de Pontevedra
A Ramallosa e as Illas Estelas. Trátase de dúas áreas ZEC diferenciadas ao sur de Pontevedra, entre Nigrán e Baiona, protexidas nunha mesma zona xeográfica. A primeira concéntrase na costa xunto á praia A Ladeira. Nas súas 92 hectáreas de marisma e zona de dunas residen 17 especies específicas designadas pola Directiva que regula estes espazos da Unión europea.
As Illas Estelas abarcan 700 hectáreas que comprenden no seu 99 % unha área mariña que protexen ata 6 especies de aves. A importancia reside no seu pequeno arquipélago preto da costa, con fondos mariños ben conservados.
Costa da Vela e Cabo Udra. Outros dous espazos ZEC que se localizan ao final das rías de Vigo e de Pontevedra. Entre ambas abarcan máis de 2.000 hectáreas, gran parte delas de zona mariña. A Costa da Vela acolle a 18 especies protexidas, a maioría son mamíferos e aves, 7 e 6 respectivamente. Mentres, o Cabo Udra acolle a 26, 21 delas aves e 3 mamíferos.
Ensenada de San Simón. Localízase xunto a Vilaboa, Redondela e Soutomaior. Correspóndenlle ao redor de 2.200 hectáreas das que o 95 % son área mariña, e é fogar de 26 especies protexidas, 21 delas aves e 3 mamíferos. Posúe unha representación importante de hábitat intermareal sobre lodo-areosas. A poboación de anátidos alcanza os 3.500 exemplares e acolle aves limícolas en época migratoria.
A provincia de Pontevedra conta con nada menos que 18 destes espazos naturais
Zonas de especial protección no interior de Pontevedra
Brañas de Xestoso. Serie de lagoas e zonas húmidas nas comarcas de Deza e Tabeirós, entre os municipios da Estrada, Forcarei e Silleda sobre un terreo de mil hectáreas. Está composto principalmente por matogueira e turbeira onde residen ata 16 especies sensibles, 11 delas aves e 3 mamíferos.
Gándaras de Budiño. Preto de mil hectáreas no municipio do Porriño sobre importantes formacións de bosque de ribeira na conca do río Louro. Destaca a súa vexetación e alberga 39 especies protexidas, 27 delas aves e 5 mamíferos.
Monte Aloia. Goza da denominación de Parque Natural, único en Pontevedra e sexto na comunidade galega. Nos seus máis de 700 hectáreas residen 21 especies protexidas onde unha vez máis a maioría son aves, 10.
Monte Faro. Enclave que se atopa de maneira limítrofe e compartindo terreo entre Lugo e Pontevedra. Desde os seus montes pódense apreciar ademais as provincias de Lugo e Ourense. Nos seus tres mil hectáreas residen 20 especies protexidas das que máis da metade son aves. A importancia desta área natural atópase nas súas características de media montaña.
Serra do Cando. Supera as cinco mil hectáreas de bosque atlántico e de ribeira combinado con matogueira, dando acubillo ata 26 especies protexidas, entre as máis numerosas hai 12 especies de aves, 5 de mamíferos e outras 5 de invertebrados.
Serra do Candán. Ocupa máis de dez mil hectáreas na que conviven 36 especies crave. Entre elas atópanse 18 aves e 6 especies mamíferos, incluído un núcleo reprodutor de lobos.
Sobreiras do Arnego. Máis de mil hectáreas na que se estenden áreas de bosque atlántico con influencia mediterránea. Linda con varios municipios do norte interior de Pontevedra e garda no seu espazo 30 especies sensibles. As máis numerosas volven ser as aves, con 13 de especial atención, séguenlle 7 de invertebrados e 5 mamíferos.
Zonas de especial protección nas concas fluviais dos ríos de Pontevedra
O resto de espazos corresponden a zonas limitadas ás concas de diferentes ríos. Son os do río Lérez, Tea e o sistema fluvial Ulla-Deza. O primeiro esténdese sobre unha modesta superficie de 150 hectáreas nas que dá acubillo a 30 especies protexidas das que 18 volven ser aves. A súa importancia reside no potencial piscícolo do curso fluvial e a súa vexetación ribeiriña.
Pola súa banda, o espazo delimitado do Tea alcanza 356 hectáreas con 35 especies baixo a tutela da Rede Natura 2000. Ademais da súa formación ribeiriña, é un curso fluvial importante para o Salmón Atlántico.
O sistema fluvial Ulla -Deza abarca unha extensión que supera as 1.600 hectáreas onde viven 49 especies. Entre as máis numerosas hai 24 especies de aves protexidas, 9 invertebrados, 6 mamíferos e outras 6 de peixes.
Máis información en MAPAMA, Xunta de Galicia e European Environmental Agency
