Vía da Prata
O Camiño Sanabrés ou Vía da Prata empeza no sur de España e percorre o interior de Galicia no seu traxecto último ata Santiago de Compostela. Trátase dunha gran calzada romana, duns mil quilómetros, que une a península e transcorre por fermosas paraxes naturais xunto a restos patrimoniais de gran valor histórico e artístico.
Mosteiros, ríos e pazos danse a man cunha paisaxe esplendorosa na provincia de Pontevedra, en concreto, nos municipios de Dozón , Silleda e A Estrada, polos que pasa o Camiño Sanabrés. Con respecto á orixe deste itinerario, tense constancia da súa existencia desde a época fenicia e grega; establécense no ano 139 a. C. as primeiras noticias documentadas sobre a calzada.
Etapa Dozón-Bendoiro (18,4 km)
Recentemente chegados de Oseira, en Ourense, cruzaremos O Castro, en Dozón, en cuxas proximidades se atopa o mosteiro e igrexa monacal de San Pedro de Vilanova, xoia da arte románica galega do século XII. Se continuamos cara a Lalín por carreiros rurais de gran beleza natural poderemos visitar a igrexa de San Martiño, que formou parte dun mosteiro fundado no século X.
Pasaremos por Pontenoufe e estaremos xa en Lalín; alcanzaremos Puxallos e A Xesta. Despois, Botos e Donsión conducirannos a Bendoiro.
Etapa Bendoiro-Outeiro (33,8 km)
Neste itinerario, ao abandonar a localidade de Prado, dirixirémonos cara ao río Deza. A continuación, cruzaremos A Borralla e a ponte medieval de Taboada. Esta construción levaranos a Taboada e Trasfontao. Tras este último lugar chegariamos a Silleda.
Antes pódese tomar un desvío para coñecer o soado santuario do Corpiño, aínda en territorio lalinense. Situado en Losón, as súas romarías de verán e inverno atraen ata esta pequena localidade miles de fieis. Na comarca, outras áreas destacadas son a fervenza do río Toxa ou o mosteiro de Carboeiro, enclaves que, se se dispón de tempo, recoméndase gozar.
O percorrido continúa en dirección a Silleda, cruzando a ponte medieval sobre o río Deza, facendo un alto nas igrexas románicas de Fiestras e Ansemil. Despois de Silleda, O Foxo e Margaride adentran á e ao camiñante na Bandeira.
Xa na Estrada, Castrovite, Loimil, Os Casares, As Carballas, Oca e Arnois despiden a Vía da Prata na provincia de Pontevedra. Antes de abandonala poderemos visitar o pazo de Oca, cuxos xardíns seducen todo o ano.
